Serbia e zhgënjyer nga BE, Bernabiç: S'kam asgjë të mirë për të thënë për sjelljen e Europës në veri

Serbia e zhgënjyer nga BE, Bernabiç: S'kam asgjë të

Kryeministrja e Serbisë, Ana Bërnabiç, ka kritikuar sjelljen e Bashkimit Europian në lidhje me tensionet në veri të Kosovës.

Duke folur për televizionin serb Pink, shefja e qeverisë serbe tha se aktualisht Brukseli nuk po bën asgjë, ose po bën fare pak për zgjidhjen e situatës në pikat kufitare që lidhin Serbinë me Kosovën.

“Nuk kam asgjë të mirë për të thënë për sjelljen e Evropës, për sjelljen e BE-së. Unë mendoj se Marrëveshja e Brukselit është çështje e BE-së. Nënshkrimi i saj ndodhet në Marrëveshjen e Brukselit” tha ajo.

Prej 8 ditësh serbët në veri të Kosovës kanë bllokuar vendkalimet kufitare Jarinjë dhe Bërnjak, që ndodhen në këtë zonë, në shenjë kundërshtimi ndaj vendimit të Qeverisë së Kosovës për të vendosur masa reciprociteti mbi targat e automjeteve të Serbisë.

Me vendimin e Qeverisë, të datës 20 shtator, të gjitha automjetet nga Serbia që hyjnë në Kosovë, duhet të pajisen me targa të përkohshme.

Në vendkalimet kufitare është vendosur edhe njësia speciale e Policisë së Kosovës.

Bërnabiç tha se Marrëveshja e Brukselit për lëvizje të lirë midis Kosovës dhe Serbisë “është shkelur qartazi në Kosovë”, sepse në veri “nuk duhet të ketë njësi speciale të policisë”.

Sipas saj, as Asociacioni i komunave me shumicë serbe në Kosovë nuk është formuar, edhe pse kanë kaluar nëntë vjet nga Marrëveshja e Brukselit që parasheh formimin e tij.

Bërnabiç tha se BE-ja “jo vetëm që toleron moszbatimin e Marrëveshjes së Brukselit tash e nëntë vite, por hesht për shkeljen e qartë të saj”.

Masa të ngjashme ndaj makinave me targa të Kosovës, Serbia zbaton prej vitesh.

Bashkimi Evropian dhe Shtetet e Bashkuara kanë bërë thirrje për shtensionim të situatës.

Ndërsa kryeministri i Kosovës, Albin Kurti, ka deklaruar se të dy shtetet duhet të heqin përdorimin e targave të përkohshme.

EMISIONET