Kriza e karburantit thellohet në Rusi / Sulmet ukrainase godasin ekonominë, rritet presioni ndaj Kremlinit

Kriza e karburantit në Rusi po përshkallëzohet në nivel kombëtar, ndërsa sulmet e Ukrainës ndaj infrastrukturës energjetike kanë shkaktuar mungesa të furnizimit në pjesën më të madhe të vendit dhe po shtojnë presionin mbi ekonominë ruse.

Sipas raportimeve, dy të tretat e 83 rajoneve të Rusisë po përballen me probleme në furnizimin me karburant. Situata më kritike paraqitet në Krime, ku autoritetet kanë shpallur gjendjen e jashtëzakonshme dhe kanë pezulluar shitjen e karburantit, duke goditur rëndë edhe sektorin e turizmit.

Presidenti Vladimir Putin e pranoi publikisht ekzistencën e problemeve, por i minimizoi ato, duke deklaruar se mungesat nuk janë "kritike". Megjithatë, qeveria ruse po shqyrton masa të reja, përfshirë ndalimin e eksporteve të karburantit për të garantuar furnizimin e brendshëm gjatë sezonit të korrjes.

Ndërkohë, në rrjetet sociale po qarkullojnë pamje të radhëve të gjata dhe përplasjeve mes shoferëve në pikat e furnizimit me karburant, ndërsa Moska ka kufizuar publikimin e të dhënave zyrtare mbi çmimet dhe rezervat.

Ekspertët paralajmërojnë se mungesat dhe rritja e çmimeve të karburantit po ushqejnë inflacionin dhe po rëndojnë më tej ekonominë ruse. Banka Qendrore e Rusisë ka sinjalizuar se situata mund të ketë pasoja afatgjata, duke e bërë krizën një nga sfidat më serioze ekonomike për Kremlinin që nga nisja e luftës në Ukrainë.