Aksident me vd*kje në aksin Peqin-Elbasan/ Automjeti përplas këmbësorin, humb jetën 73-vjeçari

Një aksident me pasojë vdekjen e një personi është regjistruar paraditen e kësaj të premteje në aksin e rrugës kombëtare Peqin–Elbasan.

Ngjarja ka ndodhur pak pas orës 10:00, në fshatin Përparim, në territorin e Bashkisë Peqin. Sipas informacioneve paraprake, një i moshuar, identiteti i të cilit nuk është bërë ende i ditur, është përplasur nga një furgon gjatë lëvizjes në këtë segment rrugor.

Për shkak të përplasjes së fortë, 73-vjeçari ka pësuar dëmtime të rënda dhe, pavarësisht rrethanave, nuk ka mundur t’u mbijetojë plagëve, duke ndërruar jetë në vendngjarje.

Menjëherë pas aksidentit, në vendngjarje kanë mbërritur shërbimet e Policisë dhe grupi hetimor, të cilët kanë nisur veprimet për zbardhjen e plotë të rrethanave të aksidentit.

Ndërkohë, po punohet edhe për identifikimin e viktimës, si dhe për sqarimin e dinamikës së ngjarjes.

Pritet që Policia e Shtetit të dalë me një njoftim zyrtar, i cili do të hedhë më shumë dritë mbi shkaqet e aksidentit dhe përgjegjësitë e mundshme.