INVESTIMET NË ZVËRNEC/ Berisha: Po përdoren emra ndërkombëtarë për të krijuar mbrojtje politike

Kreu i Partisë Demokratike, Sali Berisha, në një bashkëbisedim online me qytetarët, është ndalur te çështja e investimeve në zonën e Zvërnecit dhe hetimet që lidhen me të.

Në fjalën e tij, ai ka folur për një dosje hetimore që sipas tij lidhet me korrupsion dhe krim të organizuar, e cila është hapur prej rreth një viti nga prokuroria speciale.

Sipas tij, në këtë periudhë janë ndërmarrë hapa administrativë për dhënien e lejeve të zhvillimit në zonë, pavarësisht se ajo ishte nën hetim.

Berisha ka ngritur pretendime se këto leje janë përdorur si përpjekje për të krijuar mbrojtje politike dhe për të ndikuar në ecurinë e hetimeve, duke përmendur edhe përfshirjen e një kompanie të lidhur me Jared Kushner dhe familjarë të presidentit amerikan Donald Trump.

Ai ka akuzuar qeverinë për mungesë transparence dhe për standarde të dyfishta në raport me institucionet e drejtësisë, duke përmendur raste të ndryshme të zyrtarëve të lartë dhe çështje të tjera që sipas tij nuk janë trajtuar njësoj.

Sipas tij, situata në Zvërnec ngre pikëpyetje serioze mbi mënyrën se si menaxhohen pronat publike dhe projektet strategjike në vend.