Zinc Media Group lançon “Cicada”/ Platforma e re me IA që synon të ndryshojë industrinë e krijimit të përmbajtjes

Zinc Media Group ka prezantuar mjetin e ri të Inteligjencës Artificiale “Cicada”, një platformë e krijuar për të mbështetur kompanitë e prodhimit dhe për të sjellë mënyra të reja në krijimin e filmave, programeve dhe përmbajtjeve kreative.

Kompania britanike, e specializuar në prodhimin dhe shpërndarjen e përmbajtjeve faktike, bëri të ditur se gjatë vitit 2025 ka gjeneruar disa milionë paund të ardhura nga projekte të lidhura me Inteligjencën Artificiale, përfshirë reklama televizive të krijuara me ndihmën e kësaj teknologjie.

“Cicada është një shesh lojërash me një qëllim. Ne po punojmë me kolegët tanë për të përmirësuar punën e tyre në filma, evente dhe përmbajtje, si dhe për të treguar potencialin që ka Inteligjenca Artificiale për klientët dhe industrinë në përgjithësi”, tha Olly Strous, drejtor teknik i Zinc Media Group.

Platforma e re do të shërbejë si një qendër ku ekipet krijuese dhe klientët mund të eksplorojnë mundësitë që ofron Inteligjenca Artificiale në proceset e prodhimit.

Industria mediatike po përfshin gjithnjë e më shumë teknologjinë AI në rrjedhat e punës, nga ideimi dhe prodhimi deri te shpërndarja e përmbajtjeve, ndërsa kompanitë kërkojnë mënyra më efikase për të tërhequr audiencat.