Zgjohesh keq pas një ëndrre? Shkenca tregon pse emocionet e natës ndikojnë ditën

Një studim i ri ka zbuluar se ëndrrat nuk janë thjesht skena që shfaqen gjatë gjumit, por mund të ndikojnë në mënyrën si ndihemi pasi zgjohemi. Sipas kërkimeve, emocionet që përjetohen në ëndrra, veçanërisht frika apo gëzimi, lidhen me gjendjen emocionale të mëngjesit.

Studiuesit kanë analizuar mënyrën se si truri përpunon emocionet gjatë gjumit dhe kanë gjetur se disa ëndrra mund të lënë gjurmë te humori dhe gjendja psikologjike e një personi gjatë ditës.

Studimi, i publikuar në revistën shkencore “Sleep”, përfshiu mbi 1 mijë e 500 persona mbi moshën 18 vjeç. Pjesëmarrësit raportuan të dhëna për gjumin, kohën e fjetjes, zgjimet gjatë natës, kujtesën e ëndrrave dhe gjendjen emocionale pas zgjimit.

Rezultatet treguan se personat që përjetonin frikë në ëndrra kishin më shumë mundësi të zgjoheshin me humor negativ. Ndërkohë, ëndrrat me emocione pozitive u lidhën me një gjendje më të mirë shpirtërore në mëngjes.

Sipas të dhënave të studimit, njerëzit që përjetonin frikë gjatë ëndrrave kishin rreth 7% më shumë gjasa të zgjoheshin me humor të keq. Në të kundërt, ata që shihnin ëndrra me emocione pozitive kishin më shumë mundësi të nisnin ditën me një gjendje më të mirë.

Psikologia Nicole Andreoli shpjegon se ëndrrat janë një temë e zakonshme në terapi, pasi shumë njerëz kërkojnë të kuptojnë lidhjen mes tyre dhe përvojave të jetës reale. Sipas saj, ëndrrat me ngarkesë të fortë emocionale mund të ndikojnë në mënyrën si ndihemi pas zgjimit.

Specialistët e gjumit shpjegojnë se gjatë fazës REM, kur ndodhin shumica e ëndrrave, truri përpunon kujtime dhe emocione. Kjo fazë mund të shërbejë si një mënyrë që mendja të përballet me stresin dhe përvojat emocionale.

Megjithatë, ndikimi i ëndrrave nuk është i njëjtë për të gjithë. Personat që menaxhojnë më mirë emocionet mund të përjetojnë më fort ëndrrat me ngarkesë emocionale, pasi truri i tyre përpunon më shumë ndjenja gjatë gjumit.

Për ata që zgjohen pas një ëndrre të rëndë, ekspertët sugjerojnë disa mënyra për të përmirësuar humorin: ekspozimin ndaj dritës natyrale, pak aktivitet fizik, dëgjimin e muzikës së preferuar dhe shmangien e analizimit të tepërt të ëndrrës.

Për të reduktuar makthet, disa specialistë rekomandojnë teknikën e “provës mendore të ëndrrës”, ku personi imagjinon një version më pozitiv të një ëndrre që përsëritet shpesh.

Gjithashtu ndihmojnë një rutinë e rregullt gjumi, kufizimi i kafeinës dhe alkoolit para fjetjes, shmangia e përmbajtjeve stresuese dhe mbajtja e një ditari ëndrrash.

Sipas psikologëve, ëndrrat nuk duhen parë vetëm si diçka negative. Ato mund të jenë një proces natyral i trurit për të përpunuar emocionet, kujtimet dhe stresin e përditshëm.