SHBA nis një valë të re sulmesh ndaj Iranit, Trump paralajmëron Teheranin: Duhet të sillet më mirë

Tensionet mes Shteteve të Bashkuara dhe Iranit janë rritur sërish, pasi ushtria amerikane ndërmori një valë të re sulmesh ndaj objektivave ushtarake iraniane.

Në të njëjtën kohë, presidenti Donald Trump i dërgoi një mesazh të drejtpërdrejtë Teheranit, duke kërkuar ndryshim të qëndrimit përballë presionit amerikan.

Sipas ushtrisë amerikane, sulmet kishin në shënjestër kapacitetet ushtarake iraniane që, sipas Uashingtonit, përdoreshin për të kërcënuar anijet që kalojnë në Ngushticën e Hormuzit.

Ndërkohë, mediat shtetërore iraniane raportuan aktivizimin e mbrojtjes ajrore në Teheran.

Nga ana tjetër, Irani njoftoi se ka goditur objektiva ushtarake amerikane në rajon, përfshirë Bahreinin dhe Kuvajtin, duke e çuar në ditën e pestë përballjen mes dy vendeve.

Negociatori kryesor iranian, Mohammad Bagher Ghalibaf, bëri të ditur se Teherani nuk sheh arsye për të zbatuar marrëveshjen ekzistuese nëse nuk përfiton prej saj.

Një ditë më parë, Donald Trump kishte paralajmëruar se SHBA mund të godiste ura dhe termocentrale nëse Irani nuk rikthehej në tryezën e bisedimeve javën e ardhshme.

I pyetur nëse do të vendoste një afat për këtë paralajmërim, Trump nuk dha një datë konkrete, por tha se autoritetet iraniane e dinë se çfarë pritet prej tyre dhe duhet të ndryshojnë sjellje.

Më vonë, gjatë një samiti për mbrojtjen, presidenti amerikan u shpreh se Irani kërkon një marrëveshje, por shtoi se mbetet për t'u parë nëse Uashingtoni do të zgjedhë rrugën e negociatave apo do ta çojë më tej përballjen.