Uashingtoni sulmoi cisternën e naftës në Hormuz, Teherani: Jemi në një luftë ekzistenciale me SHBA

Përplasja mes Shteteve të Bashkuara dhe Iranit ka hyrë në një fazë të re, pasi ushtria amerikane përdori raketa Hellfire për të ndaluar një anije cisternë nafte në Ngushticën e Hormuzit, një nga rrugët më të rëndësishme detare për furnizimin global me energji.

Sipas Komandës Qendrore të SHBA-së (CENTCOM), raketat goditën oxhakun e anijes “Belma”, me flamur të Curacao-s, pasi ekuipazhi nuk iu përgjigj disa paralajmërimeve për ndalim.

Goditja detyroi anijen të ndalonte lëvizjen, ndërsa autoritetet amerikane bënë me dije se ajo po drejtohej drejt ishullit Kharg dhe nuk po vijon më lundrimin në ujërat iraniane.

Operacioni u zhvillua në ditën e pestë të veprimeve ushtarake amerikane në rajon. Forcat amerikane kanë goditur gjithashtu sisteme të mbrojtjes bregdetare dhe pozicione raketash iraniane, ndërsa më herët kanë shënjestruar depo raketash dhe objekte ushtarake në ishullin strategjik Grand Tunb pranë Hormuzit.

Sulme janë raportuar edhe në disa zona të Iranit, përfshirë Teheranin, Ahvazin, Bandar Abbasin, Shirikun dhe Qeshmin. Ndërkohë, Irani ka reaguar me sulme ndaj objektivave në Bahrein dhe Kuvajt, pa raportime për viktima apo dëme të mëdha.

Autoritetet iraniane bëjnë me dije se sulmet amerikane kanë shkaktuar mbi 35 viktima dhe më shumë se 300 të plagosur.

Përshkallëzimi i fundit ka rritur shqetësimet për një konflikt më të gjerë mes dy vendeve, pas dështimit të armëpushimit të arritur më herët mes palëve.

CENTCOM ka bërë me dije se objektivat e goditura lidhen me kapacitete ushtarake iraniane që, sipas Uashingtonit, mund të përdoren për të penguar lirinë e lundrimit në Ngushticën e Hormuzit, përmes së cilës kalon një pjesë e madhe e furnizimeve botërore me naftë dhe gaz.

Kriza u përshkallëzua pasi Irani njoftoi mbylljen e Ngushticës së Hormuzit, ndërsa SHBA rivendosi masat detare kundër Teheranit. Garda Revolucionare Islamike ka paralajmëruar se do të pengojë eksportet e energjisë nga rajoni.

Pas zhvillimeve të fundit, çmimi i naftës Brent është rritur mbi 85 dollarë për fuçi, duke reflektuar pasigurinë e tregjeve për furnizimet globale.

Trump kërkon marrëveshje, Irani paralajmëron përballje
Presidenti amerikan Donald Trump ka bërë thirrje që Irani të pranojë një marrëveshje, duke paralajmëruar se operacionet ushtarake mund të zgjerohen nëse tensionet vazhdojnë.

Trump ka përmendur mundësinë e goditjes së objektit nëntokësor “Pickaxe Mountain”, i lidhur me programin bërthamor iranian.

Nga ana tjetër, kryetari i Parlamentit iranian, Mohammad Bagher Ghalibaf, ka thënë se marrëveshjet mes dy vendeve nuk mund të funksionojnë nëse SHBA nuk respekton angazhimet e saj. Ai e ka përshkruar përballjen aktuale si një konflikt të drejtpërdrejtë mes Iranit dhe Amerikës, duke lidhur sigurinë e vendit me kontrollin e Ngushticës së Hormuzit.

Në këtë situatë të tensionuar, Trump ka bërë të ditur edhe lirimin e shtetases amerikane Dena Karari, e cila mbahej në Iran që prej dhjetorit 2024.