VIDEO+EMRAT/ Vodhën 12 subjekte në 2 muaj, kapet hajduti 21-vjeçar, në kërkim bashkëpunëtori i tij

Blutë e Lezhës kanë vënë në pranga 21-vjeçarin Manuel Medja dhe kanë shpallur në kërkim bashkëpunëtorin e tij, shtetasi Elger Uka pasi gjatë muajve maj dhe qershor të këtij viti grabitën xhirot ditore në 12 subjekte.

Arrestimi i të riut u krye pas denoncimeve të shtetasve të prekur nga kjo veprimtari e paligjshme e dy të rinjve.

NJOFTIMI

Lezhë/Finalizohet operacioni i koduar “Llogaritë”, për nxjerrjen përpara përgjegjësisë penale, të autorëve të një sërë vjedhjesh në qytet, gjatë muajve të fundit.

Vodhën xhirot ditore të 12 subjekteve, kapet 21-vjeçari dhe punohet për kapjen e bashkëpunëtorit të tij.

Si rezultat i veprimeve hetimore të kryera menjëherë pas kallëzimeve të disa shtetasve, së gjatë muajve maj dhe qershor, 2026, iu kishin vjedhur xhirot ditore në subjektet që administronin në qytetin e Lezhës, shërbimet e Komisariatit të Policisë Lezhë finalizuan operacionin e koduar “Llogaritë”.

Në kuadër të operacionit u vu në pranga shtetasi M. M., 21 vjeç, banues në Lezhë, si dhe u shpall në kërkim shtetasi E. U., 26 vjeç.

Nga hetimet dyshohet se 2 shtetasit kanë bashkëpunuar për të vjedhur xhirot ditore, në 12 subjekte.

Punohet për kapjen e 26-vjeçarit, si dhe për zbardhjen e vjedhjeve të tjera që mund të kenë kryer këta shtetas”, thuhet në njoftimin e policisë.