Nga produktiviteti te ankthi, kur kërkimi i punës kthehet në varësi!

Një fenomen i ri, i njohur si “doomjobbing”, po tërheq vëmendjen e ekspertëve të karrierës, të cilët paralajmërojnë se kërkimi i vazhdueshëm dhe i pakontrolluar i punës mund të ketë pasoja negative si në rezultatet profesionale, ashtu edhe në mirëqenien emocionale.

Termi përshkruan zakonin e kalimit të orëve të tëra duke kërkuar vende pune, duke dërguar aplikime të shumta dhe duke kontrolluar vazhdimisht platformat e punësimit pa një strategji të qartë. Edhe pse kjo sjellje shpesh perceptohet si produktive, ekspertët thonë se në realitet ajo mund të rrisë stresin, frustrimin dhe pasigurinë.

Ashtu si fenomeni i njohur “doomscrolling”, që lidhet me konsumimin e pandërprerë të lajmeve negative në rrjetet sociale, edhe “doomjobbing” krijon një cikël të pafund kërkimi.

Kandidatët kalojnë nga një njoftim te tjetri, aplikojnë në pozicione që nuk përputhen gjithmonë me profilin e tyre dhe përfundojnë të mbingarkuar emocionalisht.

Sipas ekspertes së lidershipit dhe zhvillimit të karrierës, Shari Leid, ky fenomen është në thelb një mekanizëm përballimi me stresin që shpesh maskohet si produktivitet. Ajo thekson se pasiguria në tregun e punës dhe konkurrenca e lartë i shtyjnë shumë profesionistë të ndihen vazhdimisht në kërkim të mundësisë së radhës.

Ekspertët paralajmërojnë se aplikimet masive nuk janë domosdoshmërisht më efektive. Dërgimi i të njëjtit CV në dhjetëra vende pune mund të zvogëlojë shanset për t’u dalluar nga rekrutuesit, ndërsa mungesa e përgjigjeve mund të ndikojë negativisht në vetëbesim dhe motivim.

Përveç aspektit profesional, “doomjobbing” lidhet edhe me lodhjen mendore. Refuzimet e njëpasnjëshme, pritja e përgjigjeve dhe presioni për të qenë gjithmonë aktiv në kërkimin e punës mund të krijojnë stres të vazhdueshëm psikologjik.

Specialistët rekomandojnë që kërkimi i punës të bëhet në mënyrë strategjike, duke vendosur orare të caktuara për aplikime, duke u fokusuar te cilësia e CV-ve dhe jo te numri i tyre, si dhe duke investuar më shumë në krijimin e kontakteve profesionale. Sipas tyre, pushimet e herëpashershme nga platformat e punësimit mund të ndihmojnë në ruajtjen e energjisë, motivimit dhe qartësisë gjatë procesit të kërkimit të një pune të re.