Përdhunuan dhe shfrytëzuan për prostitucion 15-vjeçaren në Greqi, arrestohet në Itali tutori shqiptar

Ai kërkohej në Greqi sëbashku me 12 shqiptarë të tjerë, për trafikim qeniesh njerëzore, shfrytëzim seksual të të miturve dhe pornografi për fëmijë.

Viktima e dyshuar e grupit, një vajzë 15-vjeçare.

30-vjeçari shqiptar u ndalua në Kremones nga policia.

Tani ai është në burg. Gjykata e Apelit në Brescia do të vlerësojë ekstradimin.

Në kuadër të hetimeve të kryera nga policia greke, shqiptari dhe bashkëpunëtorët e tij me një dredhi dyshohet se kanë bindur pesëmbëdhjetëvjeçaren të shkonte në Athinë për t'u bashkuar me të dashurin e saj, duke favorizuar kështu hyrjen e saj klandestine në vend.

Me të mbërritur në Greqi, në dhjetor 2014, 15-vjeçarja dyshohet se ka pësuar dhunë seksuale dhe është detyruar të kryejë prostitucion për më shumë se një muaj.

Dy javë më parë Shërbimi i Bashkëpunimit Policor Ndërkombëtar ka alarmuar kolegët e Skuadrës Fluturuese të Kremones për të verifikuar praninë e shqiptarit në provincë dhe kjo pasi nga hetimet rezultoi se 30-vjeçari kishte familjarë në Casalasco.

Pas disa ditësh kërkime dhe monitorimi të të njohurve të tij, policët u vunë në gjurmët e tij në Kremones dhe e bllokuan.

Pas identifikimit në komisariat, shqiptari u dërgua në burg.

itali greqi arrestohet shqiptari perdhunim