Romario "shpërthen" ndaj Ancelottit pas eliminimit të Brazilit: Do t’ia kisha grisur kontratën

Eliminimi nga Botërori 2026 është një traumë që në Brazil ende nuk e kanë përpunuar. Zemërimi ka mbizotëruar mbi zhgënjimin dhe gjuetia e fajtorëve sapo ka nisur. Ish-kampioni i Seleçaos, Romario, sulmon frontalish Carlo Ancelottin, duke kërkuar shkarkimin e tij të menjëhershëm. Nëse ka një fajtor për mënyrën se si shkuan gjërat në SHBA, ai nuk mund të jetë tjetër veç trajnerit italian, i cili ka kontratë deri në vitin 2030.

“Do ta kisha grisur menjëherë”, është hyrja e reflektimit që e vendos diskutimin në planin e një kritike shumë të ashpër, të pakompromis, që nuk lë asnjë rrethanë lehtësuese, deri në pikën sa të thotë për trajnerin: “Shko në ferr!”. Humbja ndaj Norvegjisë (2-1) sigurisht që nuk ishte një katastrofë si Mineirazo, poshtërimi 7-1 i pësuar nga Gjermania në vitin 2014, por paraqitja dhe rezultati (të shoqëruara edhe nga një përshtypje negative për të gjithë aventurën botërore) qenë po aq shkatërruese emocionalisht.

Romario për Ancelottin: “Do t’ia kisha grisur kontratën”
Romario e vuri Ancelottin në bankën e të akuzuarve, e gjykoi me procedurë të përshpejtuar dhe e dënoi brenda pak minutash. Përmes kanalit të tij zyrtar televiziv dha një verdikt pa apel. “Pas ndeshjes do të kisha hyrë në dhomat e zhveshjes dhe do t’i kisha thënë: Faleminderit shumë, mirupafshim dhe shko në ferr.

Unë do t’ia kisha grisur kontratën”. Por kjo është vetëm pjesa e parë e shpërthimit të ish-kampionit të botës; ajo që thotë pak më vonë sqaron pse nuk mund të ketë asnjë hapësirë për negociata me përzgjedhësin aktual. “Le të më çojnë edhe në gjykatë, do të shohim çfarë ndodh. Nuk ka asnjë mënyrë që Ancelotti të qëndrojë në stolin e Brazilit pas këtij dështimi, kësaj turpi”.

Ish-futbollisti kujtoi më pas se në të kaluarën trajnerë të tjerë i kanë paguar menjëherë pasojat e rezultateve negative. Pse të mos ndodhë kështu edhe me Ancelottin? “Jua kam thënë në tre emisionet e mëparshme dhe po e përsëris edhe një herë këtu – shtoi Romario. – Është e papranueshme, duhet të largohet.

Nuk mund të vazhdohet kështu, dreqi ta hajë! Kemi pasur Dungën, humbi dhe u largua. Kemi pasur Felipão Scolarin, ai fitoi Kupën dhe qëndroi. Kemi pasur Titen, humbi, qëndroi dhe humbi sërish. Tani kemi këtë Ancelottin e mallkuar, që humbi dhe do të vazhdojë ta bëjë këtë”.

Trajneri në shënjestër të kritikave: “Po të ishte brazilian, do ta kishit bërë copë-copë”
Fronti kundër Ancelottit po fiton shumë mbështetës, siç ndodh gjithmonë kur gjërat në fushë shkojnë keq. Dhe, ç’është më e keqja, të shohësh Argjentinën të shpëtojë për një fije dhe të vazhdojë rrugëtimin në Botëror është një kafshatë vërtet e vështirë për t’u kapërdirë. Sipas ish-trajnerit Luxemburgo, tekniku italian po trajtohet ndryshe nga trajnerët brazilianë.

“Ancelotti ka bërë shumë gabime në këtë Botëror dhe ju të medias nuk thoni asgjë. Po të ishte një trajner brazilian, tashmë do ta kishin bërë copë-copë. Por meqë është i huaj, askush nuk thotë asgjë”. Pjesa e dytë e kundërshtimeve i kushtohet qasjes taktike. “Si mundet Brazili të kalojë nëntëdhjetë minuta duke u mbrojtur kundër Norvegjisë? U pa qartë se luajti me frikë”.