Botërori 2026 shkruan historinë/ Katër ekipet më të mira të FIFA-s në gjysmëfinale për herë të parë

Botërori 2026 ka hyrë në fazën më vendimtare, ndërsa për herë të parë në historinë e Kupës së Botës, katër kombëtaret e para në renditjen e FIFA-s kanë siguruar njëkohësisht vendet në gjysmëfinale.

Franca, Argjentina, Spanja dhe Anglia do të përballen për dy biletat e finales, duke krijuar një fazë finale ku janë bashkuar skuadrat kryesuese të futbollit botëror.

Në çerekfinale, Anglia siguroi kualifikimin pas fitores 2-1 ndaj Norvegjisë, ndërsa Argjentina, kampione në fuqi, mposhti Zvicrën me rezultatin 3-1 pas kohës shtesë.

Më herët, Franca dhe Spanja kishin kaluar gjithashtu pengesën e çerekfinaleve, duke plotësuar katërshen historike të turneut.

Gjysmëfinalet tashmë janë përcaktuar. Më 14 korrik, Franca do të përballet me Spanjën në një duel mes dy prej skuadrave më të forta të turneut.

Një ditë më pas, më 15 korrik, Anglia do të sfidojë Argjentinën e Lionel Messit në një përballje që pritet të jetë një nga momentet më të ndjekura të këtij Botërori.

Me katër kombëtare të pozicionuara në krye të renditjes së FIFA-s, Botërori 2026 ka sjellë një situatë të rrallë, ku elita e futbollit botëror është vetëm dy hapa larg trofeut më të rëndësishëm.