Jon Bon Jovi shpall rikthimin në skenë / “Jam shëruar plotësisht pas operacionit në kordat vokale”

Legjenda e rokut Jon Bon Jovi ka deklaruar se është “shëruar plotësisht” pas një ndërhyrjeje kirurgjikale në kordat vokale, duke konfirmuar rikthimin e tij në skenë pas katër vitesh mungesë.

64-vjeçari ka bërë të ditur se turneu i ri “Forever” do të nisë më 7 korrik në Madison Square Garden në Nju Jork, përpara një serie koncertesh ndërkombëtare që përfshijnë edhe ndalesa në Angli dhe Irlandë.

Në një intervistë për revistën “PEOPLE”, artisti tregoi se periudha pas operacionit në vitin 2022 ka qenë e vështirë, por vendimtare për rikuperimin e tij profesional. Ai theksoi se ndërhyrja ishte e nevojshme pasi një nga kordat vokale kishte filluar të atrofizohej, duke rrezikuar karrierën e tij në muzikën live.

“Jam shëruar plotësisht. Ka zgjatur më shumë nga sa prisja, por duhej të bëhej siç duhet. Nuk e humbëm kurrë besimin,” u shpreh Bon Jovi.

Ai shtoi se procesi i rikuperimit e ka ndryshuar mënyrën e tij të të jetuarit, duke e bërë më të përqendruar te momenti dhe tek gjërat e thjeshta të përditshme.

Sipas tij, rikthimi në skenë përfaqëson një “rilindje” artistike dhe emocionale, ku fokusi nuk është përsosmëria, por lidhja me publikun dhe energjia e muzikës live.

Turneu “Forever” pritet të shënojë një nga ngjarjet më të rëndësishme muzikore të verës, duke rikthyer Jon Bon Jovi dhe grupin e tij në skenën botërore pas një pauze disa-vjeçare.