A e rrit kafeja hormonin e stresit? Ja çfarë tregojnë studimet

Kafeja mund të ndikojë në rritjen e hormonit të stresit, veçanërisht në orët e para të ditës. Këtë tregojnë studime të fundit, të cilat sugjerojnë se koha kur konsumohet kafeja luan një rol të rëndësishëm në reagimin e organizmit ndaj kafeinës.

Kafeja është një nga pijet më të konsumuara në botë dhe kafeina që ajo përmban ndihmon në rritjen e vigjilencës. Megjithatë, sipas kërkimeve të fundit, ajo mund të ndikojë edhe në rritjen e nivelit të kortizolit, hormonit që lidhet me reagimin e trupit ndaj stresit.

Ky efekt është më i dukshëm në mëngjes, kur organizmi prodhon natyrshëm më shumë kortizol. Konsumimi i kafesë në këtë periudhë mund ta rrisë edhe më tej nivelin e këtij hormoni.

Ndryshimet e vogla të kortizolit gjatë ditës konsiderohen normale, por nivelet e larta për një periudhë të gjatë mund të lidhen me probleme shëndetësore. Kafeina mund të shoqërohet gjithashtu me simptoma si rrahje të shpejta të zemrës, nervozizëm, pagjumësi dhe shqetësime në stomak.

Për ata që duan të ulin konsumimin e kafesë, rekomandohet që filxhani i parë të pihet më vonë gjatë ditës, të vendoset një orar për ndërprerjen e kafeinës në orët e pasdites dhe të zëvendësohet gradualisht me alternativa si çajrat bimorë, uji ose kafeja pa kafeinë.

Për menaxhimin e stresit, ekspertët rekomandojnë edhe aktivitete fizike të rregullta, gjumë të mjaftueshëm, meditim, një regjim ushqimor të balancuar dhe më shumë kohë në natyrë.