"Ik p*rdhu"/ Mel C zbulon debatin me Victoria Beckham që rrezikoi ta nxirrte nga Spice Girls

Mel C ka zbuluar se karriera e saj me Spice Girls ishte shumë pranë një fundi të parakohshëm pas një debati me Victoria Beckham, në një periudhë kur grupi sapo po niste rrugëtimin drejt suksesit ndërkombëtar.

Gjatë një interviste në podcastin The Louis Theroux Podcast, këngëtarja, emri i vërtetë i së cilës është Melanie Chisholm, kujtoi një incident të ndodhur në ceremoninë e BRIT Awards në vitin 1996, pak para publikimit të hitit "Wannabe".

Sipas saj, mbrëmja kishte kaluar në atmosferë festive, me shampanjë dhe takime me artistë të njohur, mes tyre edhe Lenny Kravitz. Në fund të natës, ndërsa grupi po largohej për të gjetur makinën, ajo pati një debat me Victoria Beckham.

Mel C tregoi se gjatë debatit iu drejtua Victorias me fjalët: "Ik pirdhu", pa dhënë më shumë detaje për arsyen që çoi në përplasjen mes tyre.

Një ditë më vonë, Mel B dhe Geri Halliwell i shprehën pakënaqësinë për sjelljen e saj, ndërsa menaxheri i grupit e paralajmëroi se një incident i ngjashëm nuk do të tolerohej më.

Ajo kujtoi se iu bë e qartë se një përsëritje e situatës do të sillte largimin e saj nga Spice Girls, një paralajmërim që e bëri të mendonte se mund të humbiste gjithçka për të cilën kishte punuar prej vitesh.

Në intervistë, Mel C foli edhe për paragjykimet që ka përjetuar gjatë kohës në grup. Për shkak të stilit të saj sportiv të veshjes, shpesh është përballur me komente dhe aludime për orientimin seksual.

Ajo u shpreh se nuk e kanë shqetësuar këto komente, por e konsideron të gabuar që njerëzit të krijojnë përfundime për jetën personale të dikujt vetëm nga mënyra se si vishet.

Sot, Mel C është nënë e një vajze 17-vjeçare, Scarlett. Ajo ka qenë në një lidhje me Thomas Starr, ndërsa prej vitit 2023 është në një marrëdhënie me modelin australian Chris Dingwall.