S’ka krizë në turizëm! Krasniqi: Rezervimet pas 16 ditësh protesta në Tiranë janë 20 % më shumë

Muaji qershor po shënon testin e parë të vërtetë për sezonin turistik veror në Shqipëri, mes një debati të ndezur nëse protestat e opozitës po shkatërrojnë apo jo ekonominë e vendit.

Ndërkohë që kryeministri Edi Rama ka ngritur alarmin se tubimet po sjellin anulime masive të rezervimeve, shifrat zyrtare dhe ekspertët e sektorit tregojnë një realitet krejtësisht tjetër.

Eksperti i turizmit, Isa Krasniqi, në një intervistë për “Ora News” ka hedhur poshtë pretendimet për një situatë alarmante. Sipas të dhënave të fundit nga INSTAT, vetëm në muajin prill janë shënuar rreth 1 milion hyrje, ku 600 mijë prej tyre ishin të huaj.

Strukturat akomoduese kanë raportuar një rritje prej 20% të vizitorëve krahasuar me të njëjtën periudhë të vitit të kaluar, duke treguar një interes të lartë nga Evropa Perëndimore, rajoni dhe vendet e Gjirit.

Pavarësisht se protestat që po zhvillohen prej më shumë se dy javësh në bulevardin "Dëshmorët e Kombit" dhe në qytete të tjera kanë sjellë disa anulime, ato konsiderohen të papërfillshme.

Ajo që vërtet përbën rrezik për vendin nuk është e drejta demokratike për të protestuar, por imazhi i pasigurisë që krijohet nga incidente të tilla si bllokimi i rrugës drejt aeroportit, të cilat prekin drejtpërdrejt turistët dhe biznesin ndërkombëtar.

Aktualisht, strukturat akomoduese, veçanërisht në kryeqytet, raportohen të jenë pothuajse të mbushura në kapacitet të plotë. Kërkesa mbetet e fortë dhe sezoni pritet të jetë jashtëzakonisht pozitiv, duke vërtetuar se protestat paqësore nuk e kanë gjunjëzuar turizmin shqiptar.

PËR MË SHUMË NDIQNI INTERVISTËN E PLOTË