Ushtria e Nigerisë liron 44 nxënës dhe mësues të rrëmbyer, arrestohen disa prej p*ngmarrësit

Ushtria e Nigerisë ka liruar 44 nxënës dhe mësues, të cilët ishin mbajtur peng për rreth dy muaj pas rrëmbimit nga tre shkolla në shtetin Oyo. Gjatë operacionit të shpëtimit u arrestuan disa persona të dyshuar, ndërsa disa ushtarë humbën jetën.

Autoritetet njoftuan se të gjithë të liruarit po marrin trajtim mjekësor në një spital, vendndodhja e të cilit nuk është bërë publike. Pas përfundimit të kontrolleve mjekësore, ata do t'u bashkohen familjeve të tyre.

Rrëmbimi ndodhi më 15 maj në tre shkolla të zonës Osiire, në shtetin Oyo. Viktimat përfshinin nxënës dhe mësues, ndërsa moshat e fëmijëve besohet të jenë nga 2 deri në 18 vjeç.

Sipas ushtrisë, operacioni i shpëtimit zgjati rreth një muaj dhe u zhvillua me pjesëmarrjen e forcave ushtarake, policisë, agjencive të inteligjencës dhe grupeve lokale të vetëmbrojtjes. Gjatë ndërhyrjes u godit edhe rrjeti që mbështeste rrëmbyesit, përfshirë bazat e tyre në pyllin e Parkut Kombëtar Old Oyo.

Autoritetet kanë arrestuar disa persona të dyshuar për përfshirje në rrëmbim, ndërsa operacionet për kapjen e të tjerëve vazhdojnë.

Lirimi i pengjeve është pritur me lehtësim nga familjarët dhe komuniteti arsimor. Përfaqësues të sindikatës së mësuesve kërkuan masa më të forta sigurie në shkolla, duke rikthyer në vëmendje shqetësimet për rrëmbimet e shpeshta që kanë prekur Nigerinë gjatë viteve të fundit.

Rrëmbimi i 44 nxënësve dhe mësuesve shkaktoi reagime të shumta në vend, pasi ndodhi në shtetin Oyo, në jugperëndim të Nigerisë, një zonë ku sulme të tilla janë më pak të zakonshme krahasuar me veriun e vendit.