Trump tërhiqet nga tarifa 20% për anijet në Hormuz / SHBA dhe Irani vijojnë përplasjen pas sulmeve të reja

Presidenti amerikan Donald Trump ka tërhequr kërcënimin për vendosjen e një tarife prej 20% ndaj anijeve që kalojnë përmes Ngushticës së Hormuzit, një prej rrugëve më strategjike detare në botë për transportin e energjisë.

Vendimi vjen vetëm një ditë pasi Trump njoftoi se SHBA do të aplikonte tarifë për ngarkesat që kalojnë në këtë korridor detar, por më pas deklaroi se masa do të zëvendësohet me “marrëveshje tregtare dhe investimesh” me vendet e Gjirit.

Ndërkohë, tensionet mes Uashingtonit dhe Teheranit mbeten të larta. Mediat shtetërore iraniane raportuan shpërthime pranë porteve strategjike të Bandar Abbas dhe Bushehr, pas një nate tjetër sulmesh reciproke.

Garda Revolucionare Islamike e Iranit pretendoi se ka goditur dy cisterna të Emirateve të Bashkuara Arabe në Ngushticën e Hormuzit, si dhe disa objektiva amerikane në Jordani dhe Bahrein.

Nga ana tjetër, ushtria amerikane bëri të ditur se ka kryer sulme ndaj objektivave që synonin të dobësonin aftësinë e Iranit për të goditur transportin detar tregtar.

Përplasja mes dy vendeve vijon të rrisë shqetësimet për sigurinë e një prej pikave më të rëndësishme të furnizimit global me energji.