OBSH dhe Brazili paralajmërojnë liderët e G7: Bota duhet të përgatitet për pandeminë e radhës

Teksa liderët e vendeve më të industrializuara të botës janë mbledhur në samitin e G7, Organizata Botërore e Shëndetësisë dhe Brazili kanë bërë thirrje për përshpejtimin e miratimit të marrëveshjes globale që synon përgatitjen e botës për pandemitë e ardhshme.

Drejtori i Përgjithshëm i World Health Organization, Tedros Adhanom Ghebreyesus, dhe presidenti i Brazilit, Luiz Inácio Lula da Silva, u kanë dërguar një letër liderëve botërorë ku kërkojnë mbështetje politike për finalizimin e marrëveshjes.

Në apel thuhet se bota nuk duhet të humbasë kohë, pasi pandemia e ardhshme mund të shfaqet në çdo moment. Thirrja vjen ndërsa në Republikën Demokratike të Kongos po përhapet një shpërthim i Ebolës, me qindra raste të konfirmuara dhe dhjetëra viktima.

Marrëveshja për pandemitë u propozua në vitin 2021, në kulmin e krizës së Covid-19, me synimin për të përmirësuar bashkëpunimin ndërkombëtar dhe reagimin ndaj emergjencave shëndetësore. Megjithatë, pas pesë vitesh negociata, dokumenti ende nuk ka hyrë në fuqi.

Një nga pikat që vazhdon të ndajë palët lidhet me aksesin në vaksina, teste dhe trajtime.

Vendet në zhvillim kërkojnë garanci për shpërndarje më të drejtë të produkteve mjekësore në rast pandemish, ndërsa industria farmaceutike shpreh shqetësime se kufizime të tilla mund të ndikojnë në kërkimin shkencor.

Në letrën e tyre, Tedros dhe Lula kujtojnë pasojat e rënda të Covid-19, që sipas vlerësimeve ndërkombëtare shkaktoi deri në 20 milionë viktima dhe një kosto ekonomike globale prej më shumë se 13 trilionë dollarësh.

Sipas tyre, finalizimi i marrëveshjes kërkon vendimmarrje politike dhe bashkëpunim ndërkombëtar, në mënyrë që bota të jetë më e përgatitur për përballimin e krizave të ardhshme shëndetësore.