MELONI MBRON PERËNDIMIN1! Kryeministrja italiane thekson unitetin perëndimor dhe mohon antiamerikanizmin

Kryeministrja italiane Giorgia Meloni deklaron se nuk ka qenë kurrë antiamerikane dhe se beson se Perëndimi është më i fortë kur vepron i bashkuar, duke bërë thirrje për më shumë kujdes në komunikimin e çështjeve të sigurisë ndërkombëtare.

Kryeministrja italiane Giorgia Meloni ka riafirmuar mbështetjen e saj për unitetin e Perëndimit, duke theksuar se qëndrimet e saj ndaj Shteteve të Bashkuara dhe aleancës transatlantike nuk kanë ndryshuar asnjëherë.

Në një intervistë për grupin televiziv Mediaset, Meloni deklaroi se nuk ka qenë kurrë antiamerikane dhe as e nënshtruar ndaj askujt, duke nënvizuar se marrëdhëniet e forta ndërtohen mbi ndershmërinë dhe besimin reciprok.

“Perëndimi është më i fortë kur është i bashkuar”, u shpreh kryeministrja italiane, duke e cilësuar unitetin mes aleatëve si një element kyç për përballimin e sfidave globale.

Meloni komentoi edhe deklaratat e Sekretarit të Përgjithshëm të NATO-s, Mark Rutte, për ngritjen e avionëve nga baza e NATO-s në Sigonella të Siçilisë gjatë Operacionit “Epic Fury”. Sipas saj, bëhej fjalë për aktivitete të parashikuara në marrëveshjet ekzistuese dhe jo për operacione me karakter agresiv.

Kryeministrja italiane tha se informacionet e bëra publike mund të ishin interpretuar gabim, përfshirë edhe nga autoritetet iraniane, ndaj kërkoi më shumë kujdes në komunikimin e çështjeve të ndjeshme të sigurisë.

Në intervistë, Meloni u ndal edhe te politika e brendshme italiane dhe zgjedhja e Presidentit të ardhshëm të Republikës në vitin 2029.

Ajo la të kuptohet se për herë të parë mund të thyhet tradita e zgjedhjes së një presidenti të mbështetur nga qendra e majtë, duke e cilësuar këtë një ndryshim të mundshëm në skenën politike italiane.