LUFTA NË GJIRIN PERSIK/ Irani k*rcënon ndërprerjen e proceseve diplomatike dhe godet Kuvajtin e Bahreinin

Garda Revolucionare e Iranit ka bërë të ditur nisjen e një operacioni me raketa dhe dronë ndaj bazave ushtarake amerikane në Bahrein dhe Kuvajt, si përgjigje ndaj sulmeve ajrore amerikane në territorin iranian.

Sipas njoftimit të saj, objektivat kanë qenë instalacione ushtarake amerikane në rajon, ndërsa paralajmërohet ndërprerja e proceseve diplomatike nëse vazhdojnë veprimet ushtarake.

Në deklaratë i referohet edhe shkeljes së marrëveshjeve të armëpushimit dhe dokumenteve të mëparshme diplomatike.

Në Bahrein u aktivizuan sirenat e mbrojtjes ajrore pas një serie sulmesh me raketa dhe dronë. Autoritetet u bënë thirrje qytetarëve të strehoheshin menjëherë, ndërsa shpërthime u raportuan në disa zona të vendit.

Sipas burimeve ushtarake, një nga objektivat kryesorë ishte Baza Ajrore Isa, ku ndodhen forca amerikane. Ministria e Jashtme e Bahreinit e dënoi sulmin, duke e cilësuar si kërcënim për sigurinë kombëtare dhe duke theksuar të drejtën e vendit për mbrojtje.

Ndërkohë, Shtetet e Bashkuara kanë ndërmarrë një tjetër valë sulmesh ajrore ndaj objektivave në jug të Iranit. Sipas Komandës Qendrore Amerikane, janë goditur sisteme radarësh, infrastrukturë mbikëqyrjeje dhe depo dronësh pranë portit të Sirikut.

Uashingtoni i lidh këto veprime me sulmin ndaj një tankeri nafte në Ngushticën e Hormuzit, për të cilin fajëson Iranin. Sipas tij, droni vetëvrasës ka goditur anijen “Kiku” në hyrje të ngushticës.