Kievi nën sulm të ri me raketa balistike, aktivizohet mbrojtja ajrore në të gjithë qytetin

Kievi është goditur nga një valë e re sulmesh ruse në orët e para të mëngjesit, ku sipas autoriteteve ukrainase janë përdorur raketa balistike.

Menjëherë pas sulmit, në kryeqytet u aktivizuan sistemet e mbrojtjes ajrore dhe sirenat e alarmit u dëgjuan në të gjitha zonat e qytetit.

Autoritetet u bënë thirrje banorëve të strehoheshin në vende të sigurta dhe të qëndronin aty deri në përfundimin e rrezikut.

Kryetari i Bashkisë së Kievit, Vitali Klitschko, bëri të ditur përmes një mesazhi në Telegram se mbrojtja ajrore ishte në veprim për të përballuar sulmin dhe u kërkoi qytetarëve të mos dilnin nga strehimoret.

Dëshmitarë në terren dhe gazetarë të AFP-së raportuan për shpërthime të forta që tronditën qytetin gjatë natës. Sipas tyre, qielli mbi Kiev u ndriçua nga shpërthimet dhe nga aktiviteti i mbrojtjes ajrore që synonte neutralizimin e raketave përpara goditjes së objektivave.

Autoritetet nuk kanë dhënë ende një bilanc zyrtar për dëmet apo viktimat, ndërsa situata në kryeqytet mbetet e tensionuar.