George Soros dhe familja e tij blejnë 18 prona në Hamptons / Banorët: “Po shkatërrojnë ishullin”

Familja e miliarderit George Soros ka zgjeruar ndjeshëm pronat e saj në zonën ekskluzive të Hamptons, duke blerë shtëpi dhe parcela toke që, sipas dokumenteve publike, arrijnë në rreth 18 prona të ndryshme në Shelter Island.

Sipas raportimeve të mediave, familja Soros kontrollon tashmë afro 120 akra tokë në ishull, duke u bërë një nga pronarët më të mëdhenj privatë në zonë.

Këto blerje janë bërë përmes një sërë kompanish të regjistruara, ndërsa disa banorë vendas shprehen të shqetësuar se zgjerimi i pronësisë po ndryshon karakterin tradicional të komunitetit të vogël.

“Po shkatërrojnë ishullin”, ka deklaruar një banor gjatë një mbledhjeje lokale, duke ngritur shqetësime për rritjen e ndikimit të investitorëve të pasur në zonë.

Banorët thonë se prania e shtuar e familjes dhe investimet e reja në prona kanë sjellë ndryshime në infrastrukturë, siguri dhe aksesin në disa zona të ishullit.

Nga ana tjetër, familja Soros nuk ka komentuar publikisht mbi këto pretendime, ndërsa raportimet tregojnë se investimet e tyre në pasuri të paluajtshme janë zgjeruar gradualisht gjatë viteve të fundit./SYRI.NET