OKB: Izraeli akuzohet për shënjestrim të qëllimshëm në Gaza! Raporti i ri flet për gjenocid të vazhdueshëm

Një Komision i Pavarur Hetimor i Kombeve të Bashkuara ka dalë me një raport ku akuzon forcat izraelite për vazhdimin e veprimeve që, sipas tij, përbëjnë gjenocid ndaj palestinezëve në Rripin e Gazës, me fokus të veçantë në shënjestrimin e fëmijëve.

Në raportin e publikuar të martën, komisioni thekson se operacionet ushtarake izraelite kanë shkaktuar vdekje, lëndime dhe trauma të rënda tek fëmijët palestinezë, duke i cilësuar këto pasoja si “të papara” në shkallën e tyre.

Sipas komisionit, shënjestrimi i pretenduar i fëmijëve përbën një tregues të qëllimit gjenocidal të autoriteteve izraelite për të shkatërruar popullin palestinez, edhe pas hyrjes në fuqi të një armëpushimi në Gaza.

“Edhe pas armëpushimit të tetorit 2025, fëmijët vazhdojnë të vriten dhe të plagosen rëndë, me shpërfillje të vazhdueshme nga Izraeli për mbrojtjen e tyre sipas ligjit ndërkombëtar”, deklaroi kryetari i komisionit, Srinivasan Muralidhar.

Qeveria izraelite i ka mohuar vazhdimisht akuzat për gjenocid dhe ka reaguar ashpër ndaj raportit, duke e quajtur atë të njëanshëm dhe propagandistik.

Ambasadori i Izraelit në OKB, Danny Danon, tha se komisioni po injoron krimet e Hamasit dhe sulmin e 7 tetorit, duke e akuzuar atë për “shpifje politike të maskuar si dokument i OKB-së”.

Sipas raportit, situata në Gaza mbetet e rëndë edhe pas armëpushimit, me sulme të vazhdueshme dhe kufizime në ndihmën humanitare dhe mjekësore, të cilat kanë ndikuar rëndë në jetën e civilëve.

Dokumenti gjithashtu përmend sulme ndaj spitaleve dhe infrastrukturës shëndetësore, si dhe pasoja të rënda afatgjata për shëndetin fizik dhe psikologjik të fëmijëve.

Nga ana tjetër, autoritetet izraelite thonë se Hamasi ka shkelur armëpushimin dhe përdor civilët si mburoja njerëzore, ndërsa luftimet dhe tensionet në terren vazhdojnë pavarësisht marrëveshjeve të ndërmjetësuara.