“Qafa teknologjike” dhe pasojat e fshehura / Pajisjet digjitale po ndryshojnë trupin e njeriut

Përdorimi i zgjatur i telefonave inteligjentë, kompjuterëve dhe pajisjeve të tjera digjitale po shoqërohet gjithnjë e më shpesh jo vetëm me pasoja në shëndetin mendor, por edhe me ndryshime fizike në trupin e njeriut.

Ekspertët paralajmërojnë se qëndrimi i gjatë para ekraneve mund të ndikojë në formën e qafës dhe shtyllës kurrizore, të dëmtojë shikimin, të dobësojë muskujt dhe të ndikojë në aftësitë motorike. Në disa raste, përdorimi i vazhdueshëm i pajisjeve është lidhur edhe me ndryshime në lëkurë, përfshirë shfaqjen e rrudhave.

Një nga problemet më të përmendura është e ashtuquajtura “tech neck” ose “qafa teknologjike”. Sipas specialistëve, kur koka mbahet e përkulur mbi ekran, qafa përballon një presion shumë më të madh se normalisht, që mund të arrijë deri në 27 kilogramë shtesë. Me kalimin e kohës, kjo mund të ndikojë në dëmtimin e disqeve të shtyllës kurrizore dhe në tensionimin e muskujve të qafës dhe shpinës.

Për të shmangur këto pasoja, mjekët rekomandojnë që pajisjet të mbahen në nivelin e syve, në një distancë të përshtatshme nga fytyra, si dhe të bëhen pushime të shkurtra nga ekrani çdo 20–30 minuta.

Dermatologët, ndërkohë, theksojnë se teoria mbi ndikimin e qëndrimit të përkulur në shfaqjen e rrudhave është e mundshme, por ende nuk ka prova të forta shkencore që e konfirmojnë plotësisht këtë lidhje. Ata paralajmërojnë gjithashtu për produkte kozmetike që pretendojnë trajtimin e “qafës teknologjike”, duke theksuar se efektet e tyre nuk janë të provuara.