VIDEO/ SHBA e nis me fitore spektakolare ndaj Paraguait

Kombëtarja e Shteteve të Bashkuara të Amerikës ka debutuar në mënyrën më të mirë të mundshme në Botërorin 2026, duke triumfuar me rezultatin e thellë 4-1 ndaj Paraguait në ndeshjen e parë të Grupit D.

Përballë mijëra tifozëve në Los Anxhelos, skuadra e drejtuar nga Mauricio Pochettino dominoi takimin nga minuta e parë deri në fund.

Amerikanët kaluan në avantazh që në minutën e 7-të. Christian Pulisic krijoi një aksion të rrezikshëm nga krahu dhe dërgoi një top në zonë, i cili përfundoi në rrjetë pas autogolit të pafat të mbrojtësit paraguajan Damián Bobadilla.

SHBA vazhdoi të ushtrojë presion dhe në minutën e 31-të dyfishoi shifrat. Pulisic depërtoi në mbrojtjen kundërshtare dhe asistoi në mënyrë perfekte për Folarin Balogun, i cili realizoi me një goditje të saktë për 2-0. Sulmuesi nuk u ndal me kaq. Në minutat shtesë të pjesës së parë, pas një pasimi të Malik Tillman, Balogun shpëtoi i vetëm përballë portierit dhe shënoi golin e tretë, duke e mbyllur fraksionin e parë me rezultatin 3-0.

Në pjesën e dytë, ritmi i lojës ra disi dhe Paraguai arriti të reagojë. Në minutën e 73-të, Mauricio shënoi golin e nderit për skuadrën e tij me një goditje të saktë brenda zonës.

Megjithatë, vendasit ruajtën kontrollin e ndeshjes dhe nuk lejuan surpriza. Në minutën e 98-të, Giovanni Reyna vulosi fitoren me një gol spektakolar. Mesfushori goditi me pjesën e jashtme të këmbës së djathtë nga kufiri i zonës, duke e dërguar topin pranë shtyllës për rezultatin përfundimtar 4-1.

Me këtë sukses të rëndësishëm, SHBA merr kryesimin e Grupit D dhe jep një sinjal të fortë për ambiciet e saj në Botërorin 2026.