Harry Kane zbulon takimin me Donald Trump: Luajtëm golf së bashku, ishte një përvojë unike

Kapiteni i Anglisë, Harry Kane, ka zbuluar se rreth një vit e gjysmë më parë zhvilloi një ndeshje golfi me presidentin amerikan Donald Trump, duke e cilësuar atë si një përvojë të pazakontë dhe të paharrueshme.

Në një deklaratë për mediat, Kane tregoi se ftesa erdhi gjatë kohës kur ndodhej në Palm Beach.

“Luajtëm golf rreth 18 muaj më parë. Ai më ftoi kur isha në Palm Beach dhe, kur të fton presidenti, është e vështirë të thuash jo”, u shpreh sulmuesi anglez.

Kane vlerësoi edhe aftësitë e Trump në golf, duke thënë se presidenti amerikan luan në një nivel mjaft të mirë.

“Ishte një përvojë surreale ta takoja dhe të luaja me të. Për të qenë i sinqertë, ai luan shumë mirë golf. Shpresoj që edhe unë të luaj në atë nivel kur të kem moshën e tij. Ishte një eksperiencë unike dhe jam mirënjohës për ftesën”, deklaroi ai.

Komentet e Kane vijnë pak pasi Donald Trump e vlerësoi publikisht sulmuesin anglez në rrjetin e tij social, Truth Social.

Kapiteni i Anglisë foli edhe për takimin me David Beckham, i cili vizitoi skuadrën gjatë stërvitjes përpara sfidës ndaj Norvegjisë.

“Na uroi fat dhe erdhi për të na mbështetur. Ai është një tifoz i madh i Anglisë dhe një legjendë e futbollit anglez. Shpresojmë ta bëjmë krenar me paraqitjet tona”, përfundoi Kane.