‘Derbi i Veriut’ spektakolar, Hamburgu përmbys Werder Bremenin

Pas katër vitesh mungesë, ‘Nordderby’ u rikthye me një ndeshje elektrizuese, ku Hamburger SV arriti një përmbysje të paharrueshme 3-2 ndaj Werder Bremen-it, duke e çuar në vetëm një humbje serinë e tyre prej gjashtë ndeshjesh në “Volksparkstadion”.

Bremen-i e nisi më mirë sfidën, me Jens Stage që rrezikoi i pari, por Hamburgu u përgjigj gradualisht me tentativa të Vieira-s dhe Philippe.

Megjithatë, miqtë goditën në momentin e duhur: në fund të pjesës së parë, Romano Schmid fitoi topin dhe shërbeu për Stage, i cili shënoi bukur në cepin e portës për 1-0.

Pjesa e dytë u ndez menjëherë. Hamburgu kërkoi me ngulm barazimin dhe pasi Backhaus ndali disa tentativa, Albert Sambi Lokonga arriti të gjente golin, duke kthyer entuziazmin te vendasit.

Vetëm pak minuta më vonë, stadiumi shpërtheu: Luka Vušković realizoi një gol spektakolar me thembër pas një goditjeje dënimi të Vieira-s, duke e përmbysur ndeshjen në 2-1.

Reagimi i Bremenit erdhi shpejt. Schmid ndërtoi një aksion të rrjedhshëm që u finalizua nga Justin Njinmah për 2-2, duke e bërë sfidën edhe më dramatike.

Por goditja finale ishte e Hamburgut: vetëm dy minuta pasi hyri në fushë, Yussuf Poulsen shënoi golin vendimtar me një goditje të saktë në cepin e portës, duke u dhënë vendasve një fitore të madhe dhe historike.

Hamburg-u merr fitoren e parë ndaj Bremen-it në shtëpi që nga viti 2016, ndërsa miqtë mbeten pa fitore jashtë fushe prej mesit të shtatorit.