"E rr*hën se nuk i ra borisë"/ Rama publikon sherrin e protestuesve me shoferin: Frymë fashiste e bullizmit në turmë

Kryeministri Edi Rama ka reaguar lidhur me përplasjet në protestat që janë mbajtur së fundmi.

Ai ka përmendur raste ku, sipas tij, drejtues automjetesh janë përballur me presion dhe sjellje agresive nga persona pjesëmarrës në marshime, për shkak se nuk kanë reaguar siç është kërkuar prej tyre.

Rama ka komentuar gjithashtu edhe klimën në rrjetet sociale, duke e cilësuar atë si një formë agresioni verbal ndaj gazetarëve dhe personave që shprehin mendime të ndryshme.

Në reagimin e tij në Facebook, ai i është referuar një fryme të përgjithshme që, sipas tij, shfaq elemente bullizmi si në hapësirën online ashtu edhe në terren.

Nga ana tjetër, Unioni i Gazetarëve Shqiptarë ka ngritur shqetësimin për rritjen e sulmeve verbale dhe linçimeve ndaj gazetarëve në rrjetet sociale dhe në hapësirën publike.

Unioni shpreh mbështetje për protestat qytetare dhe lirinë e shprehjes, por njëkohësisht kërkon reagim institucional ndaj rasteve të agresionit dhe gjuhës së urrejtjes ndaj gazetarëve.

Po ashtu, UGSH bën thirrje që gazetarët dhe institucionet të reagojnë ndaj rasteve të tilla dhe të përdorin mekanizmat ligjorë për adresimin e tyre.