“Kaluam dhimbje dhe traumë”/ Justin Baldoni flet për herë të parë pas marrëveshjes me Blake Lively

Justin Baldoni ka reaguar publikisht pas marrëveshjes së arritur në përplasjen ligjore me aktoren Blake Lively, duke marrë mbështetje nga disa prej ish-kolegëve të tij.

Aktori dhe bashkëshortja e tij, Emily Baldoni, publikuan një video në Instagram ku falënderuan njerëzit që i kanë qëndruar pranë gjatë një periudhe që e përshkruan si të vështirë, me shumë dhimbje dhe traumë.

Pas publikimit të videos, disa aktorë që kanë punuar me Baldonin në serialin “Jane the Virgin” reaguan në mbështetje të tij. Gina Rodriguez dhe Brett Dier, ish-kolegët e tij në serialin e transmetuar nga CW, i dërguan mesazhe publike mbështetjeje.

Rodriguez shkroi: “Ju dua miq. Për jetë”, ndërsa Dier komentoi: “Ju dua shumë”.

Mbështetje për çiftin shprehën edhe figura të tjera publike, përfshirë Carrie Ann Inaba, Amanda Kloots dhe Christina Perri.

Në videon e publikuar, Baldoni dhe bashkëshortja e tij treguan se kishin zgjedhur të mos flisnin publikisht për rreth dy vite, pasi nuk e shihnin si momentin e duhur.

“Thjesht nuk dukej koha e duhur”, u shpreh Baldoni, ndërsa Emily Baldoni tha se pas një periudhe reflektimi menduan se ky ishte momenti për të folur.

Çifti foli për vështirësitë që kanë kaluar gjatë kësaj periudhe dhe për ndikimin që konflikti ka pasur te familja e tyre.

Përplasja ligjore nisi në fund të vitit 2024, kur Blake Lively ngriti padi ndaj Baldonit, duke e akuzuar për ngacmim seksual dhe krijim të një ambienti armiqësor gjatë xhirimeve të filmit “It Ends With Us” në vitin 2023. Baldoni i ka mohuar akuzat.

Studioja e Baldonit, Wayfarer Studios, dhe Lively arritën një marrëveshje më 4 maj, përpara nisjes së procesit gjyqësor.

Më herët, një gjykatës federal në Nju Jork hodhi poshtë disa prej pretendimeve të ngritura në padinë e Lively, përfshirë disa akuza ndaj Baldonit.

Pas marrëveshjes, ekipet ligjore të të dy palëve publikuan një deklaratë të përbashkët ku u shpreh se filmi “It Ends With Us” mbetet një projekt për të cilin palët janë krenare dhe se zgjidhja e çështjes u jep mundësinë të gjithëve të ecin përpara.