“Divorci i papritur”: Zbuloni pse disa martesa përfundojnë pa paralajmërim...

Gjithnjë e më shumë njerëz po ndajnë përvojat e tyre të ashtuquajtura “divorce të papritura”, ku një marrëdhënie martesore përfundon pa paralajmërim dhe pa shenja të qarta më parë. Ekspertët e psikologjisë kanë shpjeguar për BBC disa nga arsyet e mundshme pas këtyre ndarjeve dhe çfarë tregojnë ato për marrëdhëniet moderne.

Një nga rastet e përmendura është ai i Eve Simmons, e cila kishte qenë në një lidhje për rreth tetë vjet e gjysmë dhe e martuar për vetëm gjashtë muaj kur bashkëshorti i saj i tha papritur se nuk ishte i lumtur, gjatë një momenti të zakonshëm në darkë. Sipas saj, ndarja ishte e menjëhershme dhe pa përpjekje për pajtim, duke e përshkruar si një “ndarje të ftohtë dhe brutale”.

Raste të ngjashme janë përhapur edhe në rrjete sociale, ku përdorues të ndryshëm flasin për të ashtuquajturin “divorc të verbër”, ose “sudden divorce syndrome”, ku njëri partner largohet papritur pa shpjegim të qartë.

Një tjetër rast është ai i Adam Davis, i cili ishte në një martesë dhjetëvjeçare kur bashkëshortja e tij u largua papritur nga shtëpia dhe ndërpreu çdo kontakt, duke e njoftuar më vonë përmes dokumenteve të divorcit. Ai thotë se përjetoi simptoma të ngjashme me stresin post-traumatik, duke përfshirë pagjumësi, humbje oreksi dhe vështirësi në përqendrim, si dhe pasoja në vetëbesim dhe marrëdhëniet e tij sociale.

Ekspertët theksojnë se, në disa raste, largimi i papritur mund të lidhet me faktorë të rëndë si abuzimi ose kontrolli i dhunshëm në marrëdhënie. Por në situata të tjera, arsyeja mund të lidhet me tiparet e personalitetit dhe mënyrën se si individët krijojnë lidhje emocionale.

Sipas profesor Jeffry Simpson nga Universiteti i Minnesota, disa persona mund të jenë më të prirur të marrin vendime të menjëhershme për shkëputje, veçanërisht kur kanë vështirësi në kompromis apo komunikim. Ai shpjegon se stilet e lidhjes emocionale, si ai shmangës apo ankthioz, mund të ndikojnë në mënyrën si zhvillohen dhe përfundojnë marrëdhëniet.

Nga ana tjetër, ekspertë të tjerë theksojnë se divorci rrallëherë është një vendim i përbashkët dhe i parashikueshëm, duke e bërë ndarjen e papritur një fenomen më të zakonshëm sesa mendohet.

Megjithatë, studiuesit nënvizojnë se nuk ekziston ende një bazë e plotë shkencore specifike për “divorcin e papritur”, por kërkimet mbi ndarjet në përgjithësi ndihmojnë në kuptimin e pasojave emocionale dhe psikologjike që ai sjell./CNN