Brooklyn Beckham i irrituar nga David dhe Victoria, postimet për Ditën e Babait rikthejnë tensionet në familje

Brooklyn Beckham është përfshirë sërish në qendër të mediave britanike, pas raportimeve për tensione të reja me prindërit e tij, David dhe Victoria Beckham.

Sipas mediave në Mbretërinë e Bashkuar, çifti Beckham ka publikuar postime për Ditën e Babait ku përfshihej edhe Brooklyn, në një përpjekje të dukshme për të sjellë një atmosferë më të qetë në familje.

Victoria ndau një foto familjare me të katër fëmijët, ndërsa David postoi imazhe të vjetra me secilin prej tyre.

Megjithatë, burime pranë Brooklyn thonë se ai nuk e ka pritur mirë këtë veprim dhe se ka kërkuar më herët të mos përfshihet në postime publike që lidhen me familjen.

Sipas tyre, çdo publikim i tillë e rikthen sërish në vëmendje konfliktin familjar që vijon prej kohësh.

Marrëdhëniet mes Brooklyn dhe familjes Beckham kanë qenë të tensionuara prej muajsh, ndërsa në media janë përmendur edhe përplasje që lidhen me jetën e tij private dhe marrëdhënien me bashkëshorten, Nicola Peltz.

Nga ana tjetër, burime pranë familjes Beckham thonë se situata mbetet e vështirë dhe se përçarja mes anëtarëve të familjes ka ndikuar emocionalisht tek të gjithë.