VAPA GODET FRANCËN/ Kulla Eiffel dhe muzetë më të famshëm në Paris shkurtojnë oraret e vizitave

Temperaturat ekstreme që kanë përfshirë Francën kanë detyruar autoritetet të kufizojnë oraret e disa prej atraksioneve më të vizituara në Paris, përfshirë Kullën Eiffel, Muzeun e Luvrit dhe Muzeun Orsay.

Sipas njoftimit të kompanisë që administron Kullën Eiffel, monumenti do të mbyllet më herët sot dhe të dielën, në orën 16:00, në vend të orës 00:45, për shkak të parashikimit të temperaturave shumë të larta.

Edhe Muzeu i Luvrit ka njoftuar se do të mbyllet në orën 16:00 deri të hënën, ndërsa Muzeu Orsay do të mbyllë dyert në orën 17:00 deri të mërkurën.

Luvri bëri të ditur se, megjithëse disa pjesë të ndërtesës janë natyrshëm më rezistente ndaj vapës, objekti mbetet i ndjeshëm ndaj temperaturave të larta dhe ende nuk është plotësisht i përshtatur për sfidat që sjellin ndryshimet klimatike. Muzeu raportoi gjithashtu rritje të temperaturave në disa ambiente, duke theksuar se ato nuk garantojnë më kushte optimale për vizitorët dhe punonjësit.

Ndërkohë, Muzeu Orsay sqaroi se vendimi synon të shmangë pritjet e gjata të vizitorëve në ambientet e jashtme gjatë orëve më të nxehta, të mbrojë stafin dhe të sigurojë ruajtjen e veprave artistike.

Autoritetet franceze kanë vendosur rreth një të katërtën e territorit të vendit në alarm të kuq për shkak të valës së të nxehtit, e cila po rrit gjithashtu rrezikun e zjarreve në fundjavën e parë të sezonit të largimeve masive për pushime.