Tragjedi në Kolumbi/ Shpërthimi në një minierë qymyri u merr jetën 7 punëtorëve (FOTO)

Shtatë persona kanë humbur jetën pas një shpërthimi gazi në një minierë të paligjshme qymyri në Kolumbi. Ngjarja ndodhi në zonën e Sutatausa, rreth 74 kilometra në veri të kryeqytetit Bogotá.

Sipas autoriteteve, shpërthimi u shkaktua nga grumbullimi i gazit metan brenda minierës.

Pas incidentit nisi një operacion kërkimi dhe shpëtimi, ndërsa fillimisht u gjet një viktimë.

Me vijimin e kërkimeve, ekipet e emergjencës nxorën edhe trupat e gjashtë minatorëve të tjerë, duke e çuar në shtatë numrin e personave që humbën jetën.

Autoritetet vendase kanë nisur hetimet për të përcaktuar rrethanat e plota të aksidentit. Minierat e qymyrit janë aktiviteti kryesor ekonomik në këtë zonë, por aksidentet e rënda janë të shpeshta, veçanërisht në minierat që operojnë në mënyrë të paligjshme ose me kushte të dobëta sigurie.

Ngjarja rikthen vëmendjen te siguria në sektorin minerar të Kolumbisë. Vetëm pak muaj më parë, dy shpërthime të tjera në miniera shkaktuan vdekjen e 13 punëtorëve, ndërsa në shkurt gjashtë persona humbën jetën në një tjetër minierë të paligjshme qymyri në të njëjtin rajon.

Ekipet e hetimit po punojnë për të zbardhur shkaqet e sakta të shpërthimit dhe për të verifikuar kushtet në të cilat operonte miniera.