Sllovakia redukton varësinë nga karburantet ruse për centralet bërthamore

Sllovakia ka arritur një marrëveshje me kompaninë elektrike “Westinghouse” me qendër në SHBA, që synon të reduktojë varësinë e saj nga furnizimet e uraniumit rus për centralet e saj bërthamore.

Kompania pjesërisht shtetërore “Slovenské elektrárne” tha sot se kishte nënshkruar një kontratë me “Westinghouse” për furnizimin me karburant bërthamor për pesë reaktorët e saj.

Deri më tani, Sllovakia, një anëtare e Bashkimit Evropian dhe NATO-s, kishte blerë karburant ekskluzivisht vetëm nga Rusia.

Pasi Rusia nisi pushtimin e saj në shkallë të plotë të Ukrainës në shkurt 2022, Sllovakia përdori një marrëveshje përjashtimi nga sanksionet e BE-së kundër Rusisë për të blerë rezerva edhe më të mëdha karburanti nga Moska.

Vendi tani shpreson të kalojë fazën e tij të tranzicionit derisa të fillojnë dërgesat e para të “Westinghouse”.

“Sigurimi i një furnizuesi tjetër të karburantit bërthamor për centralet tona është një hap i rëndësishëm në forcimin e sigurisë energjetike të Sllovakisë”, tha Branislav Strýček, drejtor i përgjithshëm i “Slovenské elektrárne”.

Karburanti, i cili do të furnizohet nga filiali suedez i “Westinghouse”, duhet së pari të kalojë testimin e sigurisë nga autoritetet sllovake për të siguruar përshtatshmërinë e tij për centralet bërthamore të tipit sovjetik të vendit si pjesë e një procedure licensimi.

Në Sllovaki, centralet bërthamore prodhojnë afërsisht 59% të prodhimit total të energjisë elektrike. //a.i/