Shtëpia që mund të blihet edhe me aksione të OpenAI, ja çfarë po ndodh në San Francisko

Rritja e kompanive të inteligjencës artificiale po ndryshon edhe tregun e pasurive të paluajtshme në San Francisko. Punonjësit e kompanive si OpenAI dhe Anthropic, të pasuruar nga aksionet e tyre, po shtojnë kërkesën për banesa, ndërsa çmimet kanë arritur nivele rekord.

Një vilë në lagjen Duboce Triangle është kthyer në shembullin më të qartë të këtij fenomeni. Pronarët ishin të gatshëm të pranonin edhe aksione të OpenAI ose Anthropic si pjesë të pagesës për pronën, e cila kishte një vlerë fillestare prej rreth 3 milionë dollarësh.

Për shtëpinë u interesua edhe një inxhinier i OpenAI, i cili po shqyrtonte mundësinë e përdorimit të një pjese të opsioneve të aksioneve për ta blerë atë. Sipas BBC-së, kjo është një praktikë që po reflekton pasurinë e krijuar nga bumi i inteligjencës artificiale në zonën e Gjirit të San Franciskos.

Pas ngadalësimit të viteve të pandemisë, San Francisko është rikthyer në qendër të industrisë teknologjike. Në muajin mars, qyteti u rendit sërish si tregu më i shtrenjtë i banesave në Shtetet e Bashkuara, duke kaluar San Josen. Çmimi mesatar i një banese arriti në 1.76 milionë dollarë në maj, ndërsa ritmi i rritjes së çmimeve ishte shumë më i lartë se mesatarja kombëtare.

Agjentët e pasurive të paluajtshme raportojnë se janë shtuar blerjet me para në dorë, ankandet mes blerësve dhe ofertat që tejkalojnë ndjeshëm çmimin fillestar të pronave.

Në qendër të këtij zhvillimi janë aksionet e kompanive të inteligjencës artificiale. Qindra punonjës të OpenAI kanë shitur një pjesë të aksioneve të tyre, duke përfituar shuma milionëshe. Një situatë e ngjashme po shihet edhe te Anthropic, ndërsa tregu pret që të dyja kompanitë të hyjnë në bursë në të ardhmen.

Kërkesa është rritur jo vetëm për vilat luksoze, por edhe për apartamente dhe banesa të zakonshme. Numri i kufizuar i shtëpive të ndërtuara ndër vite dhe hyrja në treg e blerësve me fuqi të madhe financiare kanë shtyrë çmimet në nivele rekord.

Megjithatë, jo të gjithë besojnë se ky ritëm do të vazhdojë. Ekonomisti Enrico Moretti, nga Universiteti i Kalifornisë në Berkeley, vlerëson se inteligjenca artificiale ndodhet ende në fazat e para të zhvillimit, ndërsa kujton se punësimi dhe popullsia e San Franciskos nuk janë rikthyer plotësisht në nivelet para pandemisë. Sipas tij, ndryshimet në industrinë teknologjike mund të ndikojnë në ritmin e kërkesës në vitet e ardhshme.

Vila në Duboce Triangle u shit përfundimisht për 3.2 milionë dollarë, rreth 200 mijë dollarë mbi çmimin fillestar. Nëse një pjesë e pagesës u krye me aksione të një kompanie të inteligjencës artificiale, kjo mbetet e panjohur.