Putin: Rusia po përballon presionin perëndimor dhe po forcon ekonominë e kapacitetet ushtarake

Presidenti rus Vladimir Putin ka deklaruar se Rusia po vijon zhvillimin ekonomik dhe forcimin e kapaciteteve ushtarake pavarësisht presionit nga “Perëndimi kolektiv”.

Gjatë ceremonisë së ndarjes së çmimeve “Gjithçka për Fitoren” në Moskë, Putin vlerësoi mbështetjen e qytetarëve dhe tha se kontributi i tyre ka ndihmuar në përballimin e sfidave të vendit.

“Pavarësisht përpjekjeve të pjesës agresive dhe rusofobe të Perëndimit kolektiv, ne vazhdojmë të zhvillojmë ekonominë, të forcojmë financat dhe forcat tona të armatosura”, u shpreh Putin.

Sipas tij, qytetarët rusë kanë dhuruar vullnetarisht rreth 70 miliardë rubla për të mbështetur atë që Moska e quan “operacion special ushtarak”, ndërsa ai deklaroi se “fitorja na pret”.

Në ceremoninë në Qendrën Kombëtare të Rusisë u nderuan vullnetarë dhe civilë për ndihmën humanitare, reagimin në emergjenca dhe mbështetjen ndaj trupave ruse.

Putin theksoi gjithashtu rolin e Frontit Popullor Gjithë-Rus (ONF), i cili sipas tij po monitoron zbatimin e qindra udhëzimeve presidenciale dhe çështjeve të ngritura nga qytetarët.