Marta Kos: Shqipëria garanton përputhje me rregullat e BE-së për projektin e Zvërnecit

Komisionerja e Zgjerimit të Bashkimit Evropian, Marta Kos, ka bërë të ditur se Shqipëria ka siguruar Brukselin se projekti turistik me vlerë mbi 1,4 miliardë euro, i lidhur me Jared Kushner, do të respektojë të gjitha standardet mjedisore të BE-së.

Ajo tha se qeveria shqiptare është zotuar për një vlerësim të plotë të ndikimit në mjedis dhe për zbatimin e rregullave evropiane për mbrojtjen e natyrës.

Sipas saj, procesi do të monitorohet nga afër në kuadër të negociatave të anëtarësimit.

Projekti në fjalë ka shkaktuar reagime dhe protesta në Shqipëri, për shkak të shqetësimeve se mund të prekë një zonë të mbrojtur në bregdetin e Adriatikut.

Më herët, edhe Komisioni Evropian ka kërkuar kujdes nga autoritetet shqiptare për mënyrën e zbatimit të ndryshimeve ligjore që lidhen me investimet strategjike.

Kos kujtoi se Shqipëria ndodhet mes vendeve më të avancuara në procesin e integrimit në BE, por duhet të vijojë harmonizimin e plotë të legjislacionit me atë evropian, sidomos në fushën e mjedisit.

Ajo shtoi se investimet e huaja janë të rëndësishme, por duhet të zhvillohen në përputhje të plotë me rregullat e Bashkimit Evropian dhe me standardet e mbrojtjes së natyrës.