Kanadaja propozon ndalimin e rrjeteve sociale për fëmijët nën 16 vjeç!

Qeveria e Kanadasë ka propozuar një projektligj të ri që synon ndalimin e përdorimit të rrjeteve sociale nga fëmijët nën moshën 16 vjeç, në përpjekje për të rritur sigurinë online dhe për të mbrojtur të miturit nga përmbajtjet e dëmshme.

Projektligji, i quajtur “Akti i Mediave Sociale të Sigurta”, u prezantua në një njoftim zyrtar nga autoritetet në Ottawa dhe parashikon detyrimin e platformave për të zbatuar verifikim të rreptë të moshës.

Sipas draftit, platformat e mediave sociale do të duhet të kufizojnë ekspozimin e fëmijëve ndaj përmbajtjeve si shfrytëzimi seksual, materialet intime pa pëlqim, nxitja e vetëlëndimit, ngacmimi, gjuha e urrejtjes dhe përmbajtjet ekstremiste apo terroriste.

Po ashtu, ligji përfshin edhe rregullimin e chatbot-eve të inteligjencës artificiale, të cilat do të detyrohen të minimizojnë rreziqet e përgjigjeve të dëmshme dhe të raportojnë situata të rrezikshme, si raste kur përdoruesit shprehin qëllime për vetëlëndim apo dhunë.

Autoritetet kanadeze planifikojnë gjithashtu krijimin e një rregullatori të ri të sigurisë dixhitale, i cili do të mbikëqyrë zbatimin e ligjit.

Ministri Kanadez i Kulturës, Marc Miller, deklaroi se teknologjitë në zhvillim kanë krijuar rreziqe serioze për fëmijët dhe se prindërit nuk mund t’i përballojnë të vetëm këto sfida.

Kjo nismë vjen në një kohë kur disa vende të tjera, përfshirë Australinë, Francën dhe Brazilin, kanë ndërmarrë masa të ngjashme për kufizimin e aksesit të të miturve në rrjetet sociale.