Pasojat e tajfunit Bavi zgjerohen në Azi, Kina nis evakuime masive dhe paralajmëron reshje të rrëmbyeshme

Sipas parashikimeve, tajfuni pritet të prekë tokën pranë qytetit Wenzhou, në provincën Zhejiang, të dielën në mëngjes.

Edhe pse është dobësuar në një tajfun të Kategorisë 1, ai mbetet i rrezikshëm për shkak të sasisë së madhe të lagështirës që mbart.

Autoritetet kineze kanë paralajmëruar reshje jashtëzakonisht të dendura në provincat Zhejiang dhe Fujian.

Evakuimet janë kryer si masë parandaluese, ndërsa qyteti i Wenzhou, me rreth 10 milionë banorë, ndodhet pranë trajektores së parashikuar të stuhisë.

Përpara se të afrohej drejt Kinës, tajfuni Bavi goditi ishujt Sakishima në jug të Japonisë, ku plagosi të paktën pesë persona dhe la mijëra familje pa energji elektrike.

Më pas ai kaloi mbi Tajvan, duke sjellë reshje të dendura dhe duke detyruar mijëra banorë të evakuohen, pa raportime për viktima.

Më herët, stuhia shkaktoi rrëshqitje dheu në Filipine, ku humbën jetën të paktën 17 persona.

Bavi u formua fillimisht si një supertajfun, me erëra që arritën deri në 290 kilometra në orë, ndërsa gjatë lëvizjes në Paqësor u dobësua, por vijon të konsiderohet një kërcënim serioz për rajonin.

Ndërkohë, Kina jugore po përballet ende me pasojat e tajfunit Maysak, i cili goditi vendin në fillim të javës, duke lënë të paktën 39 viktima dhe dëme të konsiderueshme në bujqësi dhe infrastrukturë.