Trajtimi i fëmijëve jashtë shtetit, Vjerdha: Duhet një fond i posaçëm për të mbështetur familjet shqiptare!

 Një nismë ligjore që synon të mbështesë financiarisht dhe proceduralisht familjet shqiptare që detyrohen të kurojnë fëmijët e tyre jashtë vendit ka marrë mbështetje të gjerë qytetare. Nisma, e cila ka siguruar mbi 20 mijë firma, synon krijimin e një fondi të posaçëm shtetëror për trajtimin e rasteve që nuk mund të mbulohen nga sistemi shëndetësor shqiptar.

Në një intervistë për “Ora News”, aktivisti Kolindo Vjerdha u shpreh se projektligji lindi si nevojë për të mbushur boshllëkun ligjor dhe institucional me të cilin përballen shumë familje shqiptare. Sipas tij, aktualisht shumë prindër detyrohen të kërkojnë ndihmë përmes platformave si “GoFundMe”, fondacioneve apo mbështetjes së të afërmve, për shkak të mungesës së një mekanizmi të dedikuar shtetëror.

Vjerdha theksoi se, megjithëse ekziston një fond i përgjithshëm për trajtime shëndetësore, procedurat burokratike janë tepër të ndërlikuara dhe shpesh pengojnë familjet të përfitojnë mbështetjen e nevojshme në kohën e duhur.

“Kur një fëmijë nuk mund të trajtohet në Shqipëri, koha është e kufizuar dhe familjet përballen njëkohësisht me shqetësimin për shëndetin e fëmijës dhe me sfidën për të siguruar fondet e nevojshme”, tha ai.

Sipas nismëtarëve, projektligji parashikon krijimin e një zëri të veçantë në buxhetin e shtetit, i cili do të miratohet çdo vit dhe do të dedikohet ekskluzivisht për kurimin e fëmijëve brenda dhe jashtë vendit. Ky fond do të menaxhohet nga institucionet shtetërore, të cilat do të marrin përsipër edhe të gjithë procedurën administrative, duke lehtësuar barrën për familjet.

Nisma ka gjetur mbështetje në qytete të ndryshme të vendit, ku aktivistë dhe qytetarë janë angazhuar në mbledhjen e firmave. Sipas Vjerdhës, numri i firmave ka tejkaluar ndjeshëm pragun minimal ligjor, çka dëshmon për mbështetjen e gjerë që gëzon kjo nismë në opinionin publik.

Aktualisht, dokumentacioni ndodhet në proces verifikimi nga Komisioni Qendror i Zgjedhjeve. Pas përfundimit të këtij procesi, projektligji do t’i kalojë Kuvendit për shqyrtim dhe votim. Nismëtarët shpresojnë që iniciativa të marrë mbështetjen e të gjitha forcave politike, duke e konsideruar atë një ndihmë konkrete për familjet që përballen me sëmundje të rënda të fëmijëve të tyre.

Kolindo Vjerdha: Shqipërisë, por edhe nga sistemi shëndetësor duke parë raste të ngjashme, duke parë se si familjet po detyroheshin të gjendeshin përballë vetëm zgjidhjeve nëpërmjet formulave të GoFundMe duke kërkuar ndihma tek të afërm apo duke kërkuar në ato të cilat janë edhe qendra, të cilat ndihmojnë pikërisht familjet kur përballen me raste të fëmijëve që nuk mund të kurohen brenda vendit.

Pamë se ekzistonte një boshllëk ligjor dhe një mundësi për hir të së vërtetës edhe nga ana financiare dhe në hapësirat e buxhetit të shtetit, që kjo mund të krijohej dhe mund të përmbushej pikërisht nëpërmjet një projektligji i cili do ishte specifik dhe do ndikonte pikërisht për të mbushur gjithë këtë boshllëk dhe të ndihmonte familjet. Si nga ana e lehtësimit procedural, ku ekziston sot një fond i përgjithshëm jo specifik për fëmijët, por ekzistojnë disa procedura, VKM, të cilat janë për të gjithë qytetarët, por aspekti procedural dhe burokratik është jashtëzakonisht i ndërlikuar dhe shumë familje përballen me vështirësi dhe pamundësi për të arritur realisht marrjen e mbështetjes financiare.

Dhe padyshim fondi është realisht shumë i kufizuar. Po ashtu dhe nga ana tjetër, përballja me këtë sfidën e madhe, ku ti nga njëra anë ke një fëmijë i cili nuk arrin të kurohet brenda vendit, koha është tërësisht e limituar, por duhet të përballesh për gjetjen e fondeve tek fondacione të ndryshme.

Ky projektligj kërkon mbështetja në qytete të ndryshme të Shqipërisë, mund të themi që është shpërndarë në shumicën e qendrave dhe qyteteve të Shqipërisë, ku aktivistë të ndryshëm janë bërë pjesë, janë bashkëngjitur, qytetarë të ndryshëm janë bërë pjesë, duke e mbështetur nëpërmjet mbledhjes së firmave, duke arritur një shifër e cila padyshim tejkalon edhe detyrimin ligjor i cili kërkohet me një mbështetje mbi 20 mijë firma, duke e tejkaluar. Kjo tregon një vullnet të qytetarëve për ta mbështetur këtë nismë ligjore dhe këtë projektligj.

Atëherë, bëhet fjalë për sëmundje të cilat sistemi jonë shëndetësor nuk arrin që t'i mbulojë, bëhet fjalë për atë aspektin procedural të mënyrës apo atyre rregullave të brendshme të cilat lehtësohen ose kalon përgjegjësia nga ana e vetë institucionit për t'i mbështetur. Pra janë sëmundje të cilat në sistemin tonë shëndetësor nuk arrijnë që të kurohen dhe detyrimisht lind nevoja për t'i çuar dhe për t'u kuruar jashtë vendit. Por ajo çka synon në vetvete projektligji është ndërtimi i një zëri.

Pra, do të thotë, kërkon një zë buxhetor të veçantë në buxhetet e cila do miratohet çdo vit, që shkon specifikisht për mbështetjen e fëmijëve për kurimin e tyre brenda dhe jashtë vendit. Dhe pikërisht ky fond i veçantë lehtëson në çdo lloj forme të gjithë kalvarin procedural dhe mbështetjen e cila do vijë pastaj për çdo familje apo për këdo i cili gjendet përpara apo përballet me këto vështirësi dhe kërkon mbështetjen nga ana e institucioneve. Pra, ia kalon të gjithë përgjegjësinë institucioneve. Janë institucione të cilat kryejnë të gjithë aspektin procedural dhe vetë institucionet më pas edhe e mbështesin dhe kanë këtë fond të gatshëm që kalon më pas në mbështetje.

Tani, në aspektin se ku ndodhet kjo nismë ligjore, pas përfundimit dhe mbledhjes së firmave, KQZ-ja në këtë moment verifikon dhe të gjithë procedurat a janë ndjekur në mënyrën e duhur dhe më pas ia kalon Kuvendit. Dhe padyshim vendimmarrja e fundit është tek ata të cilët janë sot të zgjedhurit, që kështu e përcakton ligji, që ata duhet të jenë dhe duhet të vendosin në mbështetje, padyshim, të kësaj nisme.

Dhe shpresojmë shumë që të gjejë mbështetje të gjerë nga të gjithë aktorët politikë, pikërisht për një nismë e cila vjen në dobi të familjeve shqiptare, vjen në dobi dhe ndihmë reale për këdo që sot përballet me mungesat reale që ka sistemi jonë shëndetësor, i cili nuk arrin të mbulojë një pjesë të mirë të sëmundjeve dhe aq më tepër pastaj për një kategori e cila është kaq e rëndësishme për këdo prej nesh, që janë fëmijët.