“Kupa u derdh”, Lika: Ja prapaskenat e revoltës masive që po dridh pushtetin e betonit

Një krizë e thellë besimi ndaj institucioneve dhe një indinjatë e akumuluar prej vitesh kanë shpërthyer në rrugët e kryeqytetit, duke shënuar ditën e 27-të të një qëndrese qytetare pa precedent.

Aktivisti Edison Lika i ftuar në një intervistë në “Ora News”, tha se shkëndija që ndezi këtë valë zemërimi ishte ngjarja në Zvërnec, e cila ekspozoi hapur rënien e shtetit dhe monopolit të tij mbi dhunën.

Pamjet e transmetuara drejtpërdrejt, ku policia private dhunonte dhe merrte peng qytetarë ndërsa Policia e Shtetit qëndronte si spektatore e pafuqishme, shërbyen si katalizator për një lëvizje të fuqishme shoqërore.

Ajo që nisi si një thirrje rutinë në rrjetet sociale për t'u mbledhur me një numër të kufizuar njerëzish para Drejtorisë së Policisë, u transformua brenda pak orësh në një marshim masiv me mbi tre mijë qytetarë drejt Ministrisë së Brendshme dhe Kryeministrisë.

Kjo nuk është thjesht një protestë kundër një rasti të izoluar dhune, por një revoltë kundër një sistemi të tërë që, sipas aktivistëve, mbron oligarkët dhe biznesmenët në kurriz të qytetarëve.

Njerëzit refuzojnë të pranojnë narrativën se përparimi i vetëm i vendit përkthehet ekskluzivisht në kulla betoni dhe resorte luksoze, në të cilat shqiptari mesatar nuk ka asnjë mundësi financiare të shkelë.

Mbrojtja e natyrës dhe kërkesa për një zhvillim të qëndrueshëm ekonomik kanë dalë në plan të parë, duke sfiduar hapur politikat aktuale të cilat favorizojnë betonizimin e çdo hapësire.

Më e rëndësishmja, kjo lëvizje duket se ka rrëzuar murin e gjatë të apatisë dhe mosbesimit social.

Në vend të zgjidhjes individuale përmes emigrimit – e cila prej vitesh ishte alternativa e vetme politike përballë dëshpërimit – qytetarët po zgjedhin rezistencën kolektive. Ata kanë kuptuar se fqinjët dhe bashkëqytetarët ndajnë të njëjtat halle, duke thyer mitin se shqiptarët nuk mund të bëhen bashkë për një kauzë të përbashkët.

Turma e pandalur po kërkon të marrë në dorë fatet e vendit, duke kërkuar një llogaridhënie të drejtpërdrejtë dhe jo thjesht një rrotacion boshe pushteti çdo katër vite.

PËR MË SHUMË NDIQNI INTERVISTËN E PLOTË