Kujdes nga temperaturat e larta! Dollenberg: Ja gabimet që po dërgojnë me urgjencë fëmijët dhe të moshuarit në spitale

Temperaturat ekstreme që po përfshijnë Evropën dhe Shqipërinë, duke arritur deri në 40 gradë Celsius, kanë sjellë krizat e para shëndetësore dhe mbipopullim të urgjencave mjekësore. Këto kushte atmosferike po kthehen në një rrezik serioz për jetën, duke ndikuar drejtpërdrejt në shëndetin e grupeve më vulnerabël.

Mjekja Aurora Dollenberg në një intervistë për “Ora News” thekson se rreziku më i lartë u kanoset fëmijëve të vegjël nën dy vjeç dhe të moshuarve mbi 70 vjeç, tek të cilët pasojat e të nxehtit mund të jenë jetëkërcënuese.

Të moshuarit që vuajnë nga sëmundje kronike, si tensioni i lartë apo diabeti, po përballen me përkeqësime drastike. Mjekët e urgjencës paralajmërojnë se gjatë verës, një gjendje hutimi, marrje mendsh apo zbehje në fytyrë shpesh ngatërrohet me lodhjen e zakonshme nga vapa.

Megjithatë, këto simptoma mund të fshehin probleme tepër serioze, si infarkti apo insulti cerebral (goditja në tru). Nëse këto shenja injorohen dhe pacienti nuk dërgohet në kohë në spital, pasojat rrisin ndjeshëm shkallën e vdekshmërisë.

Po ashtu, ekspozimi i gjatë në diell gjatë punës ose sforcimeve fizike mund të shkaktojë kolaps të sistemit të qarkullimit të gjakut, një gjendje e njohur në gjuhën popullore si "rënia e damllasë", e cila mund të rrezikojë jetën edhe të personave plotësisht të shëndetshëm.

Nga ana tjetër, fëmijët nën dy vjeç mbeten grupi më i cenueshëm, pasi nuk mund të shprehin shqetësimet e tyre. Dehidratimi tek kjo grupmoshë mund të përkeqësohet në mënyrë kritike brenda pak orësh.

Një detaj alarmant i theksuar nga mjekësia është se medikamentet bazë, përfshirë antibiotikët apo paracetamolin për uljen e temperaturës, veprojnë më dobët tek fëmijët nën pesë vjeç gjatë ditëve me nxehtësi ekstreme.

Rekomandohet një test i thjeshtë i lëkurës për të verifikuar gjendjen e fëmijës: nëse lëkura e kapur me gishta mbetet lart dhe nuk kthehet menjëherë në gjendjen normale, ky është një tregues i dehidratimit total që kërkon ndërhyrje të menjëhershme.

Për të parandaluar situatat kritike, ekspertët bëjnë thirrje për shmangien absolute të ekspozimit në diell gjatë orëve të pikut, ajrosjen e ambienteve të mbyllura dhe konsumimin e vazhdueshëm të lëngjeve. Një theks i veçantë vihet tek pasurimi i ujit me elektrolite dhe kripëra, një detaj kyç për hidratimin e trupit që shpesh neglizhohet nga qytetarët.

PËR MË SHUMË NDIQNI INTERVISTËN E PLOTË