RRITEN S*LMET R*CISTE NDAJ LOJTARËVE/ FIFA dhe ekspertët kërkojnë masa kundër gjuhës së urrejtjes

Rritja e rasteve të racizmit gjatë Kupës së Botës ka ngritur alarmin ne organizatat ndërkombëtare të futbollit dhe ekspertët e të drejtave të njeriut.

Abuzimet ndaj futbollistëve, si në stadiume ashtu edhe në rrjetet sociale, po shfaqen gjithnjë e më shpesh, duke e kthyer diskriminimin në një nga problemet më shqetësuese që po shoqëron turneun.

Ndër incidentet që kanë tërhequr më shumë vëmendje është ai ndaj sulmuesit francez Kylian Mbappé, i cili u bë objekt i komenteve raciste, duke çuar autoritetet franceze në hapjen e një hetimi. Sulme të ngjashme janë raportuar edhe ndaj futbollistëve të Holandës, Anglisë dhe Gjermanisë, kryesisht përmes rrjeteve sociale pas ndeshjeve të zhvilluara në turne.

Sindikata Botërore e Futbollistëve, FIFPRO, paralajmëron se sulmet ndaj lojtarëve nuk janë më raste të izoluara, por pjesë e një fenomeni në rritje. Sipas organizatës, në javët e fundit shumë futbollistë janë përballur me fyerje, kërcënime dhe komente raciste, çka tregon një model të vazhdueshëm diskriminimi.

Edhe të dhënat e FIFA-s konfirmojnë përmasat e problemit. Sistemi i monitorimit të rrjeteve sociale ka regjistruar një rritje 13-fish të abuzimeve gjatë fazës së grupeve të Kupës së Botës, krahasuar me periudhat normale. Postimet me përmbajtje raciste përbëjnë kategorinë më të madhe të rasteve të raportuara, ndërsa më shumë se 100 publikime janë referuar autoriteteve për hetime të mëtejshme.

Ekspertët argumentojnë se rritja e këtyre incidenteve lidhet edhe me klimën politike në shumë vende, ku retorika përçarëse dhe gjuha e urrejtjes janë bërë më të pranishme në diskursin publik. Sipas tyre, kjo atmosferë po reflektohet edhe në futboll, duke nxitur një pjesë të tifozëve të shprehin hapur qëndrime raciste ndaj sportistëve.

Ata theksojnë se futbolli duhet të mbetet një hapësirë që bashkon njerëzit dhe jo një vend ku racizmi dhe diskriminimi gjejnë terren për t'u përhapur, duke i bëre thirrje institucioneve sportive, autoriteteve dhe platformave digjitale të bashkëpunojnë për të parandaluar përshkallëzimin e këtij fenomeni dhe për të garantuar një mjedis të sigurt dhe gjithëpërfshirës për lojtarët gjatë Kupës së Botës.