Inter-Miami afër goditjes së madhe! Casemiro drejt MLS përkrah Lionel Messit

Inter Miami është pranë një goditjeje të madhe në merkato, pasi mesfushori brazilian Casemiro ka arritur marrëveshje me klubin amerikan dhe pritet t’i bashkohet projektit në MLS pas përfundimit të angazhimeve me përfaqësuesen e Brazilit.

34-vjeçari, aktualisht i fokusuar në Kupën e Botës, ka zgjedhur të vijojë karrierën në Shtetet e Bashkuara, duke refuzuar oferta të rëndësishme nga Europa dhe Arabia Saudite. Sipas burimeve pranë lojtarit, vendimi është ndikuar edhe nga dëshira për të luajtur përkrah Lionel Messit dhe për t’u bërë pjesë e projektit ambicioz të Inter Miamit.

Casemiro pritet fillimisht të mbyllë detyrimet me Brazilin, përfshirë ndeshjen ndaj Norvegjisë, përpara se të finalizojë zyrtarisht transferimin. Plani është që ai t’i bashkohet ekipit në një moment të përshtatshëm pas turneut, në varësi të ecurisë së Brazilit në Botëror.

Inter Miami ndërkohë po vazhdon të forcojë skuadrën me synimin për të dominuar MLS-në, pas suksesit të fundit në kampionat. Me afrimin e Casemiros, klubi amerikan shton edhe më shumë eksperiencë dhe cilësi në mesfushë.

Ky transferim do ta vendoste brazilianin në një listë të veçantë futbollistësh që kanë ndarë fushën ose dhomën e zhveshjes me Lionel Messin, duke e bërë MLS-në gjithnjë e më tërheqëse për yjet e futbollit botëror.