“E mbyllim një kapitull me mirënjohje…” / Frankie Muniz divorcohet pas një dekade martese

Ylli i njohur i serialit “Malcolm in the Middle”, Frankie Muniz, dhe bashkëshortja e tij, Paige Price, i kanë dhënë fund martesës së tyre pas 10 vitesh së bashku. Lajmin e ka konfirmuar vetë aktori përmes një mesazhi në rrjetet sociale, ku zbuloi se kishin jetuar të ndarë prej disa kohësh përpara se të merrnin këtë vendim.

Muniz sqaroi se gjatë një dekade marrëdhënie, të dy kanë evoluar dhe kanë ndryshuar, duke kuptuar se sot funksionojnë më mirë si miq të mirë dhe si prindër të përbashkët të djalit të tyre, Mauz. Ai shprehu një mirënjohje të thellë për Paige, duke vënë në dukje se ajo kishte lënë mënjanë ëndrrat e saj që ai të ndiqte të tijat.

Pavarësisht ndarjes, dyshja do të vazhdojë të bashkëpunojë ngushtë në rritjen e djalit dhe në menaxhimin e skuadrës së tyre të garave, "Muniz Racing". Aktori e mbylli deklaratën duke kërkuar respektimin e privatësisë dhe duke theksuar se po e mbyllin këtë kapitull me mirënjohje e po shohin drejt së ardhmes me optimizëm.

Frankie dhe Paige u njohën në vitin 2016, u martuan në vitin 2019 dhe u bënë prindër në mars të vitit 2021.