Shpërthimi i lisë së majmunëve në Europë, më i madhi që ka ndodhur ndonjëherë

Shpërthimi i lisë së majmunëve në Europë, më

Më shumë se 100 raste të lisë së majmunëve, një infeksion viral më i zakonshëm në Afrikën perëndimore dhe qendrore, janë raportuar në Evropë, nga zyrtarët gjermanë që e përshkruajnë shpërthimin si më të madhin ndonjëherë në rajon.

Rastet tani janë konfirmuar në disa vende duke përfshirë Mbretërinë e Bashkuar, Spanjën, Portugalinë, Belgjikën, Francën, Shtetet e Bashkuara dhe Australinë.

E identifikuar fillimisht te majmunët, sëmundja zakonisht përhapet përmes kontaktit të ngushtë dhe rrallë është përhapur jashtë Afrikës, kështu që kjo seri rastesh ka shkaktuar shqetësim.

Megjithatë, shkencëtarët nuk presin që shpërthimi të evoluojë në një pandemi si COVID-19, duke qenë se virusi nuk përhapet aq lehtë sa SARS-COV-2.

Lija e majmunëve është zakonisht një sëmundje e lehtë virale, e karakterizuar nga simptoma të etheve si dhe një skuqje të veçantë me gunga.

“Me disa raste të konfirmuara në Mbretërinë e Bashkuar, Spanjë dhe Portugali, ky është shpërthimi më i madh dhe më i përhapur i lisë së majmunëve që është parë ndonjëherë në Evropë”, tha shërbimi mjekësor i forcave të armatosura të Gjermanisë, i cili zbuloi rastin e parë në vend ditën e sotme.

Fabian Leendertz, nga Instituti Robert Koch, e përshkroi shpërthimin si një epidemi.

"Megjithatë, ka shumë pak gjasa që kjo epidemi të zgjasë gjatë. Rastet mund të izolohen mirë përmes gjurmimit të kontaktit dhe ka gjithashtu ilaçe dhe vaksina efektive që mund të përdoren nëse është e nevojshme," tha ai.

Sipas Organizatës Botërore të Shëndetësisë (OBSH) nuk ka një vaksinë specifike për linë e majmunëve, por të dhënat tregojnë se vaksinat që janë përdorur për të zhdukur linë janë deri në 85% efektive kundër lisë së majmunëve.

Rasti i parë evropian u konfirmua më 7 maj te një individ i kthyer në Angli nga Nigeria.

Që atëherë, më shumë se 100 raste janë konfirmuar jashtë Afrikës, sipas një gjurmuesi nga një akademik i Universitetit të Oksfordit.

Në Britani, janë konfirmuar 20 raste, ndërsa 14 rastet janë konfirmuar në Portugali./REUTERS/

EMISIONET