Madonna: "Inteligjenca artificiale është e kundërta e plotë e krijimit të artit"

Madonna ka shprehur shqetësimin e saj për ndikimin gjithnjë e më të madh të inteligjencës artificiale dhe teknologjisë në industrinë e muzikës, duke e cilësuar mbështetjen tek AI si "të kundërtën e plotë të krijimit të artit".

Në një intervistë për revistën Vogue Italia, ikona e muzikës kujtoi periudhën kur artistët krijonin së bashku, të udhëhequr nga pasioni dhe frymëzimi, larg presionit të shifrave dhe rrjeteve sociale.

"Na ishte një herë një kohë kur ishe i rrethuar nga piktorë, muzikantë, valltarë dhe artistë, dhe të gjithë krijonit nga një dëshirë shumë e sinqertë dhe e pastër. Kjo përvojë do të thotë shumë për mua," u shpreh ajo.

Artistja kritikoi edhe mënyrën se si industria e argëtimit vlerëson sot suksesin, duke thënë se numri i ndjekësve në rrjetet sociale është bërë kriteri kryesor për të siguruar një kontratë.

"Sot, për të marrë një kontratë me një shtëpi botuese, gjëja e parë që shohin është sa ndjekës ke. Kjo është arsyeja pse në këngën 'Bring Your Love' them: 'Mos u përpiq të më shpërqendrosh me numra'. Për mua, gjithçka filloi kur nuk mendoja për klasifikimet apo numrin e transmetimeve," tha Madonna.

Ajo zbuloi gjithashtu se, sa herë punon për muzikë të re, largohet qëllimisht nga teknologjia dhe mediat sociale për të gjetur frymëzim të vërtetë.

Nuk është hera e parë që Madonna kritikon ndikimin e teknologjisë moderne. Edhe më herët ajo ka deklaruar se rrjetet sociale kanë krijuar një "nevojë të vazhdueshme" që njerëzit të dokumentojnë çdo moment të jetës së tyre, duke humbur spontanitetin dhe përjetimin e çastit.

Deklaratat e saj vijnë në një kohë kur debati mbi rolin e inteligjencës artificiale në art dhe muzikë po bëhet gjithnjë e më i fortë, me shumë artistë që shprehin shqetësime për ndikimin e saj në krijimtarinë njerëzore.