ISH-KUZHINIERJA PADIT KYLIE JENNER/ Pretendon se humbi foshnjën pas orëve të gjata të punës dhe ngarkesës së rëndë

Ish-kuzhinierja personale e Kylie Jenner ka ngritur një padi në Gjykatën e Lartë të Qarkut të Los Anxhelosit, duke pretenduar se kushtet e vështira të punës dhe detyrat e rënda fizike gjatë një shtatzënie me rrezik të lartë çuan në humbjen e foshnjës.

Pretendimet nuk janë verifikuar ende nga gjykata, ndërsa Kylie Jenner nuk ka reaguar publikisht.

Sipas dokumenteve gjyqësore, gruaja, identiteti i së cilës nuk është bërë publik, ka punuar si kuzhiniere personale e Kylie Jenner që nga nëntori i vitit 2024.

Ajo pretendon se punonte 11 deri në 12 orë në ditë, pesë ditë në javë.

Në padi thuhet se një muaj pasi nisi punën, ajo njoftoi mbikëqyrësit se ishte tre muajshe shtatzënë dhe se shtatzënia konsiderohej me rrezik të lartë. Për këtë arsye kërkoi lehtësim të detyrave dhe përshtatje të kushteve të punës, por pretendon se kërkesat e saj nuk u morën parasysh.

Sipas saj, në prag të Vitit të Ri iu kërkua të ngrinte dhe të transportonte ushqime të rënda pa ndihmë, duke lëvizur ngarkesa në distanca të gjata dhe në terrene të vështira.

Padia përshkruan se gjatë punës ajo pësoi marramendje, vështirësi në frymëmarrje dhe u ndje keq, duke marrë ndihmën e personelit të sigurisë.

Një tjetër incident lidhet me një festë ditëlindjeje të organizuar në Palm Springs, ku ish-punonjësja pretendon se iu kërkua të vazhdonte punën pa mbështetje të mjaftueshme, ndërsa kërkesat për ndihmë u injoruan.

Sipas padisë, një ditë më vonë ajo pati gjakderdhje të rëndë dhe u dërgua me urgjencë në spital, ku mjekët konstatuan se fetusi nuk kishte më rrahje zemre.

Deri tani, Kylie Jenner dhe përfaqësuesit e saj nuk kanë bërë një reagim publik. Çështja pritet të shqyrtohet nga gjykata dhe pretendimet e paraqitura në padi mbeten akuza që ende nuk janë provuar në proces gjyqësor.